Ақпан айының алғашқы аптасы «Елімай» футбол клубы үшін айтарлықтай жаңалықпен басталды. «ALANDA» қонақ үйінің конференция залында өткен айтулы жиынға елге танымал блогерлер мен «QAZSPORT» телеарнасының ұжымы мен республикалық БАҚ өкілдері келіп қатысты. 

Елордададағы «Елімай» ФК-ның 20 күнге созылған оқу-жаттығу жиындарының қорытынды конференциясы екі кезеңнен тұрды. Алғашқы ресми жиында клубтың бас бапкері Самат Смақов бастаған команда мүшелері мен журналистер арасында ашық сұхбат өтті. Сұхбат барысында келген қонақтарға клубтың жаңа медиа-офицері Елдар Ермеков таныстырылды.

Бас бапкер тілшілердің сұрақтарына жауап беріп, клубтың алға қойған жоспарларымен бөлісті. Екінші кезең еркін тақырыптағы диалогпен жалғасып, ұйымдастырушылар тарапынан кофе-брейк ұсынылды.

Айта кетейік, Қазақстан футболының отанына айналған Семей қаласынан шыққан клуб үш дүркін ел чемпионы болғаннан кейін араға бірнеше жыл салып қазақ футболына қайта оралды. Сондай-ақ, клуб ойыншыларының қатары танымал футболистермен толығуда. Солардың бірі, «Шоша» лақап атымен танымал – Еркебұлан Нұрғалиев.