Президент жанындағы Орталық коммуникациялар қызметіндегі брифингте Қорғаныс министрінің кеңесшісі Айгүл Төлембаева мен Қорғаныс министрлігінің аппарат басшысы полковник Ербол Құмарбекұлы мерзімді қызметтегі әскери қызметшілерді еліміздің жоғары оқу орындарында тегін оқыту үшін өткізілген алғашқы іріктеудің қорытындыларын жеткізді. 

Байқауға биылғы көктемде запасқа шығарылған азаматтар қатысты.

Қорғаныс министрлігінің өкілі түсіндіріп өткендей, іріктеу әскери қызметшілер рейтингінің нәтижелері бойынша жүргізілді. Үміткерлердің жетістіктері мен кемшіліктері туралы барлық деректер министрлік сайтының «Срочники 2.0» цифрлық платформасында тіркелді.

Қолданыстағы ресурс іріктеу рәсімінің ашықтығын қамтамасыз ете алды және деректерді ауыстыру мүмкіндігін болдырған жоқ.

Сарбаздарды жоғары оқу орындары мен мамандықтар бойынша бөлу «Срочники 2.0» ақпараттық жүйесінің көмегімен де автоматты түрде жүргізіледі.

Тікелей эфирдегі брифингте сарбаздарды олардың жеке рейтингіне қарай бөлу жүргізілді. Конкурстық іріктеуге барлығы 12 548 мерзімді қызметтің сарбазы қатысты.

Барлығы 1500 орын бөлініп отыр. Әскери қызметін өтеп, запасқа шығарылғандар үшін келесі іріктеу 2023 жылдың күзінде өтеді.

Брифингке қатысушыларға іріктеуден өтпеген сарбаздардың қызметі аяқталған соң екі жыл ішінде ҰБТ тапсырмай ақылы негізде жоғары оқу орындарына түсу мүмкіндігі бар екені туралы хабарланды.