Ұлттық экономика министрі - Қазақстаннан АИИБ басқарушысы Әлібек Қуантыров Шарм-эль-Шейх қаласында (Египет) өткен Азия инфрақұрылымдық инвестициялар банкі Басқарушылар кеңесінің 8-жылсайынғы отырысына қатысты.

ҰЭМ басшысының сөзінше, ынтымақтастық жылдарында жаңартылатын энергия көздерінің (ЖЭК) жобалары іске асырылды. Атап айтқанда, Банк Жамбыл облысындағы қуаты 100 МВт жел электр станциясының құрылысын қаржыландырды. Сондай-ақ, АИИБ пандемиямен күресуге көмектесті.

Сонымен қатар, министр көміртегі бейтараптығына қол жеткізу және инфрақұрылымды дамыту саласындағы перспективалық ынтымақтастық мүмкіндігін атап өтті.

Ынтымақтастықтың тағы бір перспективалы бағыты - Орта дәліздің өткізу қабілетін пайдалану (Транскаспий халықаралық көлік бағыты).

Сондай-ақ, Азия инфрақұрылымдық инвестициялар банкі Басқарушылар кеңесінің жыл сайынғы жиналысы аясында Әлібек Қуантыров АИИБ президенті Цзинь Лицюньмен кездесу өткізді. Тараптар екіжақты ынтымақтастықтың перспективаларын талқылады.

АИИБ 2016 жылы құрылған. Оның негізгі мақсаты - Азиядағы экономикалық дамуға, инфрақұрылымды жақсартуға жәрдемдесу болып табылады. Қаржыландырудың басым бағыты энергетика, көлік, логистика, қалалық және ауылдық инфрақұрылым және т. б.