Цифрлық даму, инновациялар және аэроғарыш өнеркәсібі министрлігінің алаңында Қытайдан келген «Жібек жолы» индустриялық интернетті жылжыту орталығының өкілдерімен кездесу өтті. Тараптар ғылыми-техникалық ынтымақтастық жөніндегі өзара түсіністік туралы меморандум аясында ынтымақтастық мәселелерін талқылады.

Өткен жылдың 24-25 қарашасында ЦДИАӨМ Қытайдың Чжэцзян провинциясындағы Вэньчжоу қаласында Жібек жолы әсер еткен қалалар мэрлерінің тәжірибе алмасу жөніндегі Конференциясына қатысты. Оның аясында ЦДИАӨМ мен Жібек жолының өнеркәсіптік интернетін ілгерілету орталығы арасында ғылыми-техникалық ынтымақтастық жөніндегі өзара түсіністік туралы меморандумға қол қойылды.  

Меморандум аясында тараптар цифрлық технологиялар саласындағы ынтымақтастықты нығайтуға және дамытуға, экономиканың инновациялық секторларындағы ынтымақтастықты қолдауға және дамытуға ниетті.  

ЦДИАӨМ ғылыми-технологиялық платформаны пайдалана отырып, цифрлық трансформация және жаңғырту жолымен цифрлық қалаларды салуға мүдделі.  

Бұндай мегажоба Қазақстандағы ғылыми-зерттеу базасы мен техникалық құзыреттілік деңгейін дамытуға ықпал етеді. Ол сондай-ақ жаңа жұмыс орындарын ашып, ел экономикасының дамуына ықпал етеді.

2023 жылы «Бір белдеу, бір жол» бастамасының бастау алғанына 10 жыл толады. Осы жылдар ішінде «Белдеу мен жол» бірлескен құрылысы тарихи жетістіктерге қол жеткізіп, 150-ден астам елге пайда әкелді, ынтымақтастыққа, мүмкіндік пен өркендеуге жол ашты, ең танымал халықаралық ынтымақтастықтың кең ауқымды алаңы болды.