Биылғы жылдың қаңтар айында Қазақстан Республикасының Ауыл шаруашылығы вице-министрі Ербол Тасжүреков бастаған делегация Қытай Халық Республикасының Шаньдун провинциясына жұмыс сапарымен барды. Сапардың негізгі мақсаты - аграрлық ғылымды дамытудағы әріптестердің тәжірибесін зерделеу және екі ел арасындағы ауыл шаруашылығы саласындағы ынтымақтастықты нығайту.

Сапардың алғашқы күні вице-министр Шаньдун провинциясының ауыл шаруашылығы ғылымдары академиясының жұмысымен танысты. Сондай-ақ, Академия басшысы Лян Цзиньгуан бастаған ұжыммен екіжақты кездесу ұйымдастырылды. Кездесуде тараптар аграрлық ғылым саласында тәжірибе алмасып, пікір алмасты.

Сонымен қатар, Академия төрағасымен кездесуде «Бір белдеу - бір жол» бастамасы аясында ауыл шаруашылығы ғылымын бірлесіп дамыту және технологиялармен алмасу мәселелері талқыланды. Қос тарап инновациялық ынтымақтастықты нығайтудағы бұл қадамды жоғары бағалап, одан әрі ынтымақтастық туралы Меморандумға қол қойды.

Сондай-ақ сапар барысында Ербол Тасжүреков Қытай ауыл шаруашылығы техникасы қауымдастығы, Қытай агрохимиялық өнеркәсіп қауымдастығы, Қытай тұқым саудасы қауымдастығы, Қытай аралас фосфор тыңайтқыштары өнеркәсібі қауымдастығы және ірі бизнес өкілдері бас қосқан форумға қатысты (Сюйчжоу Инди, Пекин Фули Чжунчэн, Бейжің үлкен жауын құрты, Фейя жеміс клубы, «Далиан» ЖШС).

Форум аясында Қазақстанның ауыл шаруашылығына Қытайдың озық инновациялық технологияларын енгізу мүмкіндіктері талқыланды. Ербол Тасжүреков форум қатысушыларын Қазақстанға инвестиция салуға шақырды. Қытайлық бизнес өкілдері Қазақстанда ауыл шаруашылығы техникасы мен тыңайтқыштар өндіретін зауыт салуға ниетті екенін мәлімдеді.

Жұмыс сапары мұнан әрі IMETEC және TAISHON ауыл шаруашылығы техникасын құрастыру зауыттарының жұмысымен танысумен жалғасты. Аталған компанияның өкілдері Қазақстан фермерлері үшін қолжетімді бағамен техникалар ұсынды. Өз кезегінде вице-министр отандық ресурстардың әлеуетін атап өтіп, компанияларды Қазақстан экономикасына белсенді инвестициялауға шақырды.

Айта кетейік, ҚХР-ға сапар азық-түлік қауіпсіздігін қамтамасыз ету және климаттың өзгеруі сын-қатерлеріне қарсы тұру үшін тәжірибе мен технологиялар алмасуға ықпал ететін Қазақстан мен Қытай арасындағы ауыл шаруашылығы саласындағы ынтымақтастықты іс жүзінде жүзеге асыруға ықпал етпек.