Қазақша күрестен Десанттық-шабуылдау әскерлерінің ең мықты балуандары анықталды
Талдықорған қаласындағы "Жастар" спорт кешенінде қазақша күрестен өткен Десанттық-шабуылдау әскерлері арасындағы іріктеу чемпионаты аяқталды.
Екі күнге созылған "Десант барысы" турниріне Алматы, Қонаев және Жетісу гарнизондарының 16 балуаны қатысты.
Жеке біріншілікте "Десант барысы" белбеуі мен қасқыр терісін Жетісу гарнизоны 18404 әскери бөлімінің әскери қызметшісі аға сержант Самат Сейітов олжалады. Екінші орынды сол әскери бөлімнің өкілі сержант Жайық Қалибеков иеленді. Тұғырдың үшінші сатысына Қонаев гарнизоны 32363 әскери бөлімінің мерзімді қызмет сарбазы қатардағы жауынгер Әділбек Жанбуршинов көтерілді.
Жарыс қорытындысы бойынша командалық есептегі алтынды Кеңес Одағының Батыры генерал-майор Иван Панфилов атындағы 37-ші десанттық-шабуылдау бригадасы (Талдықорған қ.) жеңіп алды. Күміс 35-ші гвардиялық десанттық-шабуылдау бригадасының (Қонаев қ.), еншісінде. Ал қола медальға Райымбек батыр атындағы 38-ші десанттық-шабуылдау бригадасының командасы ие болды.
Енді Қарулы күштердің құрама командасы құрамындағы Десанттық-шабуылдау әскерлерінің жеңімпаздары Мемлекеттік күзет қызметінің, ҰҚК Шекара қызметінің, Ұлттық қауіпсіздік комитетінің, Ішкі істер, Төтенше жағдайлар министрліктерінің, Ұлттық ұланның, Сыбайлас жемқорлыққа қарсы іс-қимыл және Қаржылық мониторинг агенттіктерінің мықты балуандарымен күш сынасатын болады.
Күштік құрылымдар арасындағы "Әскер барысы" чемпионаты ағымдағы жылдың 29-30 наурызы аралығында Қорғаныс министрлігі Орталық спорт клубының базасында өтеді.