Қазақстан Республикасы Парламентінің Сенатымен қабылданған «Қазақстан Республикасының кейбір заңнамалық актілеріне байланыс, цифрландыру, инвестициялық ахуалды жақсарту және артық заңнамалық регламенттеуді болдырмау мәселелері бойынша өзгерістер мен толықтырулар енгізу туралы» Қазақстан Республикасының Заң жобасы Қазақстан Республикасы Парламенті Мәжілісі депутаттарының бастамасы.

Байланыс саласында енгізілген өзгерістер байланыс инфрақұрылымын дамытуға, перспективалы телекоммуникациялық технологияларды тарту үшін қолайлы жағдайлар қалыптастыруға, халық үшін байланыс қызметтерінің қолжетімділігін қамтамасыз етуге бағытталған.

Атап айтқанда, мүгедектігі бар тұлғаларды қолдау мақсатында байланыс саласындағы уәкілетті орган байланыс операторларының оларға жеңілдетілген тарифтерді ұсыну бойынша міндеттемелерін бекітетін болады. Сондай-ақ, байланыс операторларына мемлекеттік меншіктегі талшықты-оптикалық байланыс желілерін жүргізу үшін электр беру әуе желілерінің тіректерін өтеусіз мүліктік жалдау (жалға алу) мүмкіндігі берілді.

Сонымен қатар, салаларды цифрландыруды дамыту мақсатында ауыл шаруашылығы және өнеркәсіп объектілерінде байланыс қызметтерін субсидиялау енгізілді, оның тәртібін байланыс саласындағы уәкілетті орган мүдделі мемлекеттік органдармен келісе отырып, анықтайды.

Шалғай аудандарды интернетпен қамтамасыз ету үшін республикалық және облыстық автожолдар бойында талшықты-оптикалық байланыс желілері салынатын болады. Елді мекендерді дамыту жоспарларында байланыс желілерін орналастыру үшін орындар ескерілетін болады.

Байланыс саласында нарықтың жаңа қатысушысы – виртуалды байланыс операторы енгізілуде, ол бір немесе бірнеше ұялы байланыс операторларының инфрақұрылымын пайдаланады. Жұмысты бастау үшін виртуалды байланыс операторы байланыс саласындағы уәкілетті органнан тиісті рұқсатты алуы керек.

Жаңа өзгерістерге сәйкес, операторлар төтенше жағдайлар туралы жедел хабарлау үшін Cell Broadcast технологиясын ұсынуға міндетті. Жергілікті органдар шұғыл қызметтер жүйелерінің жұмысын бақылайтын болады, сондай-ақ байланыс жабдықтарын орналастыру үшін орындарды жалға алуға шекті тарифтер белгіленетін болады.

Айта кету керек, қоғамдық ғимараттарды салу кезінде тапсырыс беруші байланыс жабдықтары үшін тиісті бөлмені қамтамасыз етуі керек.

Бұл өзгерістердің барлығы байланыс қызметтерін қолжетімді етуге және олардың бүкіл ел бойынша сапасын жақсартуға бағытталған.

Сондай-ақ, инновациялар және цифрландыру саласындағы түзетулермен "Ұлттық инновациялық жүйенің бірыңғай терезесін" және осы жүйе шеңберінде орталық мемлекеттік органдардың құзыретін енгізу көзделген. Бұл нормалар инновациялық қызметті қолдау шараларының ашықтығы мен қолжетімділігін қамтамасыз етуге, ақпараттық жүйені құру арқылы ұлттық инновациялық жүйенің мониторингі мен бағалау жүйесін жолға қоюға бағытталған.

Инновациялық жүйенің тиімділігіне тәуелсіз талдау жүргізу және өңірлерде мемлекеттік технологиялық саясаттың іске асырылуына мониторинг жүргізу үшін инновациялар мен технологияларды дамыту жөніндегі шараларды іске асыру туралы инновациялық обсерваторияға жыл сайынғы ақпарат беру көзделеді. Бұл бар кедергілерді анықтауға және тиісті түзету шараларын бастауға мүмкіндік береді.

Эндаумент-қорлар үшін ғылым және білім беру ұйымдарында инновациялық жобалар мен жаңа стартаптарды қолдау мүмкіндігі ашылады. Сондай-ақ, "ИТП" ДКҚ Басқарушы комитеті төрағасының өкілеттігін ҚР Премьер-Министрінен ақпараттандыру саласындағы уәкілетті органның басшысына беру көзделеді.

Бұл шаралар инновациялық қызметті қолдау шараларының ашықтығы мен қолжетімділігін қамтамасыз етуге және елдің инвестициялық ахуалын жақсартуға бағытталған.