Депутаттар Қаржы және бюджет комитетінің кеңейтілген отырысында несие беру кезіндегі қауіптерді азайтуға, қарыз алушылардың құқықтарын қорғауға, қаржы нарығын реттеуге және атқарушылық іс жүргізуді жетілдіруге қатысты заңды талқылады.

Заң азаматтардың шамадан тыс несие алуын азайтуды көздейді. Енді микроқаржы ұйымдары белгілі бір мерзімнен кейін азаматқа айыппұл мен өсімпұлды есепке қоса алмайтын болады, демек қарыздың шамадан тыс өсуіне жол берілмейді. Борышкерлер әскери қызметке шақырылған кезде қызмет өткеру кезеңінде пайыздарды есептелмейтін болады. Оған қоса, қалыпты несие саясатын жүргізу және проблемалық берешекті реттеу үшін 2026 жылғы 1 мамырға дейін қарыздарды коллекторлық ұйымдарға беруге мораторий енгізу ұсынылды.

Одан басқа, несиенің мерзімі 90 күннен астам уақыт өткен жағдайда азаматтарға оның үстіне несие беруге, сондай-ақ жұбайының немесе жұбайының келісімінсіз несие алуға тыйым салу көзделіп отыр.

Алаяқтыққа қарсы іс-қимыл жасау үшін қаржы нарығына бірқатар шаралар ұсынылды. Осы мақсатта банктер мен микроқаржы ұйымдарына биометриялық сәйкестендірусіз клиентке электрондық қарыз беруге тыйым салынады.

Депутаттардың айтуынша, заң азаматтардың несие алу деңгейін төмендетуге, алаяқтық тәсілмен қарыздар мен микрокредиттерді және клиенттердің банк шоттарынан ақшаны заңсыз алуды ресімдеу қауіптерін азайтуға ықпал етеді.  Сондай-ақ стресстік активтер нарығының дамуына және оларды экономикалық айналымға тартуға оң әсер етеді.

Сенаторлар отырыс қорытындысы бойынша құжатты Палатаның қарауына жіберу туралы шешім қабылдады.