Қарағанды облысындағы «Сарышаған» түраралық оқу-жаттығу полигонында әскери міндеттілердің жиындары басталды.

Жиынның ашылу рәсіміне Қорғаныс министрінің бірінші орынбасары - Қарулы күштер Бас штабының бастығы генерал-лейтенант Сұлтан Қамалетдинов, Құрлық әскерлерінің қолбасшылығы, Қарулы күштердің ардагерлері, гарнизондағы әскери бөлімдердің жеке құрамы және жергілікті атқарушы орган өкілдері қатысты.

- Әскери жиындардан өту – сіздерге  әскери мамандықтарды терең меңгере отырып, күш-қуат тұрғысынан және рухани жағынан жетілуге мүмкіндік беретін, сондай-ақ Отан қорғау жолындағы ұстанымдарды айқындайтын әскери қызметтің кезеңі. Бүгіннен бастап әрқайсыңыз әскери қызмет міндеттерін атқарып жатырсыздар. Осы ретте елімізді қорғау жолында кез келген бұйрықты орындауға дайын болуларыңыз керек, -  деп атап өтті генерал-лейтенант Сұлтан Қамалетдинов әскери міндеттілерге арнаған сөзінде.

Мұнан кейін ҚР Қарулы күштері Бас штабының бастығы далалық лагерьдің оқу-материалдық базасы және инфрақұрылымымен танысты. Әскери жиындардың басты мақсаты – Қарулы күштердің жауынгерлік дайындығын арттырып, әскери дайындалған резервті дайындау және  азаматтарды тапшы әскери мамандықтар бойынша оқыту.

- Жиын күндері біздің міндет мерзімді қызмет кезінде алған дағдыларымызды еске түсіру болып табылады. Сонымен бірге  мұнда біз қару-жарақ пен әскери техниканың жаңа үлгілерімен таныса аламыз, - деді Қарағанды облысының Шахтинск қаласынан шақырылған әскери міндетті Сүндет Амандықов.

Әскери міндеттілер бір ай ішінде артиллериялық бөлімшелерде әскери техниканың бірнеше түрлерін қолдана отырып қайта дайындықтан өтетін болады. Болашақта запастан шақырылған әскери міндеттілер бөлімшелердің, взводтар мен роталардың құрамына бірігеді. Бұл өткен уақыт ішінде техникасы айтарлықтай жаңарып,  күрделене түскен Қазақстан армиясына жаңа мамандар даярлау үшін қажет.

Әскери міндеттілерді шақырту ағымдағы жылдың тамыз айының соңына дейін жалғасады. Естеріңізге сала кетейік, шақырылған әскери міндеттілер әскери қызметшілермен тең дәрежеде заттай мүлік, тамақ және медициналық қызмет көрсетумен қамтамасыз етіледі. Әскери жиындардан өту кезеңінде жұмыс орны мен атқаратын лауазымы сақталып, оларға орташа жалақы, ал жұмыс істемейтіндерге мемлекет есебінен ең төменгі жалақы төленеді.