8-ші наурыз – Халықаралық әйелдер күні қарсаңында Астанада волейболдан ведомствоаралық жарыс өткізіліп, мемлекеттік қызметшілер өзара мықтыны анықтады.

Аталған жарысты өткізудегі негізгі мақсат мемлекеттік қызметкерлер арасында салауатты өмір салтын қалыптастыру арқылы елімізде бұқаралық спортты дамыту, сондай-ақ ведомстволар арасындағы әріптестік байланысты арттырып, ұжымдық рухты нығайту көзделді.

Сайысқа Индустрия және инфрақұрылымдық даму министрлігінің, Еңбек және халықты әлеуметтік қорғау министрлігінің, Оқу-ағарту министрлігінің, сондай-ақ Әділет және Денсаулық сақтау министрліктерінің құрама командалары қатысты. Бұл ретте ойынға тек нәзік жандылардан жасақталған командалар ғана шеберлік байқасқанын айта кеткен орынды.

Мемлекеттік қызмет істері агенттігінің Мемлекеттік қызмет саласындағы бақылау департаментінің өкілі Гүлжаһан Үсенованың айтуынша, мұндай сайыстар мемлекеттік қызметшілер арасында салауатты өмірді насихаттауға және құзырлы органдар арасындағы берік ынтымақтастықтың орнауына септеседі.

Тартысты доданың нәтижесінде Индустрия және инфрақұрылымдық даму министрлігінің құрама командасы үздік үштіктен көрінді. Сондай-ақ тұғырдан Еңбек және халықты әлеуметтік қорғау мен Әділет министрліктерінің арулары орын алғанын атап өткен жөн. Жеңімпаздар мен жүлдегерлер алғыс хаттармен марапатталды.