Жауынгерлік дайындық мамандарының мерекелік күні Қазақстан Республикасы Министрлер кабинетінің қаулысымен 1992 жылдың жазында белгіленіп, Қорғаныс министрлігінің құрамында жауынгерлік дайындық басқармасы құрылды.

Оны құрудағы алғашқы қадам 1992 жылы 14 тамызда Қорғаныс министрінің жауынгерлік дайындық жөніндегі орынбасары – жауынгерлік дайындық басқармасының бастығы лауазымын бекіту болды. Бұл лауазымға генерал-майор Юрий Курматов тағайындалып, сол күннен бастап Қарулы күштердің жауынгерлік дайындық органының шежіресі басталды. 

32 жыл ішінде әртүрлі дәрежедегі көптеген әскери басшылар жауынгерлік дайындық құрылымдарында үлкен мектептен өтті. Олардың әрқайсысы қызметтік, жауынгерлік және өмірлік тәжірибеге негізделген өз үлесін қосты. Өйткені оқу-жауынгерлік міндеттерді сәтті орындау жедел, сенімді және келісілген әрекеттерге байланысты.  

Жауынгерлік дайындықты басқару органдарының офицерлері «Бірлестік», «Бейбіт миссия», «Өзара іс-қимыл», «Іздеу», «Эшелон», «Мызғымас бауырластық», «Айбалта» және «Отпантау» оқу-жаттығуларына қатыса отырып, әскери қызметшілердің даярлығының, бөлімдер мен бөлімшелердің үйлесімділік деңгейінің жылдан жылға артып келе жатқанын көрсетті.

Олардың негізгі міндеті – әскери оқыту процесін ұйымдастыру, әскери қызметшілерді даярлаудың қажетті деңгейіне, әскери бөлімдердің, бөлімшелердің, олардың әскери басқару органдарының мақсатына сәйкес жауынгерлік тапсырмалардың сәтті орындалуын қамтамасыз ететін үйлесімділігіне қол жеткізу, қолдау және жетілдіріп отыру.

 – Қазіргі уақытта жауынгерлік дайындық ғылым мен техниканың соңғы жетістіктерін пайдалана отырып, заңнамалық базаның өзгеруін, қарулы қақтығыстар тәжірибесін, оқу-жаттығулар мен сабақтар өткізуді, әскерлердің ұйымдық нысандары мен техникалық жарақтандырылуын дамыту перспективаларын ескере отырып, қатаң ғылыми негізде құрылады, – дейді ҚР ҚК Бас штабы Жауынгерлік дайындық департаментінің бастығы полковник Анатолий Довганюк.

Жауынгерлік дайындықты қамтамасыз етуде тренажер бөлімшелері мен полигон командаларының мамандары маңызды орын алады. Олар жауынгерлік және дөңгелекті машиналарды жүргізу дағдыларын, сондай-ақ экипаждар құрамындағы үйлесімді іс-қимылдарды үйретеді. Кейін бөлімше құрамындағы іс-қимылдарды пысықтап, бағдарламаларды толық меңгеруді және техника мен оқ-дәрілердің моторесурстарын жұмсамай жеке құрамның дағдыларын дамытуды қамтамасыз етеді. 

Полигон жабдықтарын жөндеу цехы да маңызды рөл атқарады.  Ал полигон жабдықтарын жөндеу бөлімінің базасында және қорғаныс-өнеркәсіп кешенінің зауыттарында оқу полигондарының электрик-операторларын және оқу тренажерлерінің мамандарын оқыту мен даярлау жүргізіледі.

Қарулы күштердегі жауынгерлік дайындық органдарының командирлері мен мамандарының күнделікті қажырлы еңбегінің арқасында оқу процестері үнемі жетілдіріліп отырады. Өткізілетін іс-шаралардың қарқындылығы мен ауқымы артып келеді. Бұл мемлекетіміздің қауіпсіздігін қамтамасыз етуде шешуші рөл атқарады.