Қазақстан Республикасының Президенті Қасым-Жомарт Тоқаев халыққа арнаған Жолдауында: «Мұны туған елге деген сүйіспеншілік, жанашырлық деуге болады. Ұлттың жаңа сапасы осындай нақты шаралар арқылы қалыптасады» дей келе, «Таза Қазақстан» жалпыұлттық акциясының арқасында елімізде жаңа мәдениеттің қалыптасып келе жатқанын атап өткен еді.

Бүгінге дейін аталған шараға облыстың 94,3 мыңнан астам тұрғыны қатысып, 3618 мекеме мен 2065 техника жұмылдырылған. Акция барысында 55,1 мың тонна қатты тұрмыстық қалдықтар шығарылып, 90,3 мың аула тазаланды. 239 саябақ пен сквер абаттандырылумен қатар, 298 ескерткіштің аумақтары ретке келтірілді. Бүгін аймақ басшысы Нұрлан Ұранхаевтың төрағалығымен өткен кеңейтілген аппараттық жиналыста Абай облыстық табиғи ресурстар және табиғат пайдалануды реттеу басқармасының басшысы Айнұр Ақмырза атқарылып жатқан жұмыстарға тоқталды.

Акция барысында тазалық жұмыстарынан бөлек, 724 шаршы метр тақтатас жөнделіп, ауыстырылды. 146,6 мың ағаш отырғызылды, оның ішінде 100 мыңға жуық қарағай көшеттері және «Семей орманы» орман резерваты аумағында 46,6 мың түп әртүрлі тұқымды ағаштар бар. Сондай-ақ 898 су жағалауы, 31,4 мың метр арықтар мен 31 субұрқақ тазартылды. Семей қаласында биылдың өзінде 46 көпқабатты тұрғын үйдің қасбеттері жөнделді.

2024 жылдың шілдесінен бастап www.tazaqazaqstan.kz цифрлық платформасы іске қосылды, ол тұрғындарға «TazaQazBot» телеграм-боты арқылы қала инфрақұрылымындағы мәселелерді, оның ішінде абаттандыру, су қоймаларының жай-күйі мен көгалдандыру мәселелерін хабарлауға мүмкіндік береді.