ҚР Еңбек және халықты әлеуметтік қорғау министрі Светлана Жақыпова «Атамекен» ҚР Ұлттық кәсіпкерлер палатасы (бұдан әрі – ҰКП) Басқарма төрағасының міндетін атқарушы Райымбек Баталовпен бірге жұмыс кеңесін өткізді. Келіссөздер барысында мемлекеттік қолдау шараларының тізілімін қалыптастыру, еңбек ресурстарының қажеттілігін, оның ішінде жұмысшы кәсіптері бойынша болжау, «ТжКБ және ЖОО студенттерінің кәсіптік практикасын Enbek.kz арқылы ұйымдастыру» жобасын іске асыру мәселелері қаралды.

Кеңеске ҚР Еңбек және халықты әлеуметтік қорғау вице-министрі Асқар Биахметов, ҰКП Басқарма төрағасының орынбасары Тимур Нахипбеков, Еңбек министрлігі мен ҰКП құрылымдық бөлімшелерінің басшылары қатысты.

Асқар Биахметов өз сөзінде Мемлекет басшысы Қазақстан халқына Жолдауында 2025 жылды Жұмысшы мамандықтар жылы деп жариялағанын еске салды. Оқу-ағарту, Ғылым және жоғары білім, Еңбек және әлеуметтік қорғау министрліктері мен Ұлттық кәсіпкерлер палатасына жұмысшы кәсіптер жылын ілгерілету жөніндегі іс-шаралар жоспарын әзірлеу тапсырылды.

«Осыған байланысты біз осы жұмысты бірлесіп үйлестіріп, орта мерзімді кезеңге арналған еңбек ресурстарына қажеттіліктің болжамын айқындауға тиіспіз. Ұлттық кәсіпкерлер палатасы еңбек ресурстарына қажеттілік болжамын қалыптастыруға қатысады. Бұл ретте жұмыс берушілер тізбесін қалыптастыру кезінде экономиканың әрбір саласындағы белсенді кәсіпорындар мен дара кәсіпкерлердің жалпы санының тек 5% - ы ғана ескеріледі. ҰКП-ның қолда бар әлеуетін ескере отырып, осы сауалнамалармен жұмыс берушілердің барынша көп саны, оның ішінде ірі, орта, шағын, шетелдік кәсіпорындар мен ауылдық елді мекендердегі кәсіпорындар қамтылғанын қалаймын. Сондай-ақ болашақта еңбек нарығы тарапынан сұранысқа ие жаңа кәсіптер бойынша кадрларға қажеттілікті ескеру қажет», – деді вице-министр.

Өз кезегінде Райымбек Баталов кеңеске қатысушыларды шағын және орта бизнеске көмек көрсетуге арналған цифрлық платформа, мемлекеттік қолдау шараларының тізілімін қалыптастыру бойынша жүргізіліп жатқан жұмыстар және ҰКП-ның еңбек ресурстарына қажеттілік болжамын қалыптастыруға қатысуы туралы хабардар етті.

Светлана Жақыпова нақты уақыттағы еңбек жағдайларының мониторингін қамтамасыз ететін Кәсіпорындардың цифрлық картасын, сондай-ақ инвестициялық жобалар бойынша дэшбордты және кәсіби стандарттар мен біліктіліктерді қамтитын Career.enbek.kz ұлттық біліктілік жүйесінің платформасын көрсетті.

Кеңес соңында тараптар шағын және орта бизнестің жұмыс жағдайларын жақсартуға және азаматтардың өмір сүру сапасын арттыруға бағытталған бірқатар жобалар шеңберінде күш-жігерді біріктіруге және меморандумға қол қоюға келісті.