Абай облысы әкімдігінде көп балалы және аз қамтылған отбасылардың мәселелерін шешуге арналған жұмыс тобының кезекті отырысы өтті. Күн тәртібінде Семей қаласындағы №6 арнайы мектеп-интернатындағы абаттандыру және қайта жаңғырту жұмыстары, сондай-ақ тұрғын үй бағдарламасын жүзеге асыру, екінші ауысымда оқитын оқушыларды тасымалдауды ұйымдастыру мәселелері қаралды.

Маңызды мәселелердің бірі – маршруттық автобустардың қозғалысы және балаларды мектептерге тегін тасымалдауды ұйымдастыруға арналды. Бүгінде қала мен ауылдық округтердегі 20 мектеп оқушыларды көлікпен тасымалдайды. 2024-2025 оқу жылында шалғайдағы 41 елді мекеннен 1241 оқушы тасымалдануда, бұл өткен оқу жылына қарағанда 19 балаға көп. Тасымалдау 24 көлік арқылы жүзеге асырылса, оның 13-і мектептерге тиесілі болса, ал қалған 11-і жалға алынған.

Ерекше қажеттіліктері бар балалардың сапалы білім алуы үшін лайықты жағдай жасауға да ерекше назар аударылды. Облысымызда 4 арнайы мектеп-интернат жұмыс істейді, онда көру, есту, сөйлеу және интеллекттік бұзылыстары бар 603 бала білім алуда. Олардың 92 бала үйде білім алады.

Сондай білім ошақтарының бірі – 1963 жылы негізі қаланған Семей қаласындағы №6 арнайы мектеп-интернаты. Қазір мұнда 251 оқушы оның 167-сі мектепте, 84-і үйде білім алады. Мекеме балаларды бес мезгіл тегін тамақпен қамтамасыз етіп, қауіпсіз оқу ортасын қалыптастырып отыр. Ол үшін дыбыстық хабарландыру жүйесі мен 63 бейнекамера орнатылған.

2024 жылы мектеп-интернатты қаржыландыру 655,4 млн теңгені құрайды. Сонымен қатар, 2023 жылы «Қазақстан халқына» қоры бағдарламасы аясында материалдық-техникалық базаны нығайтуға 35 млн теңге бөлініп, мектепті жаңа интерактивті тақталармен, музыкалық және логопед кабинеттерімен жабдықтауға, асхана мен шеберханаларды жаңғыртуға мүмкіндік туды.

Ерекше қажеттіліктері бар балаларға арналған мектептерде сапалы білім беруді қамтамасыз ету және материалдық-техникалық базаны нығайту Абай облысы әкімдігінің тұрақты бақылауында болады.