ҚР Цифрлық даму, инновациялар және аэроғарыш өнеркәсібі министрлігі ҚР Ғылым және жоғары білім министрлігі және Astana Hub-пен бірлесіп, Қазақстанның жоғары оқу орындарының оқытушыларына арналған ауқымды оқыту бағдарламасын іске қосады. 47 университеттен 700 оқытушы Tech Orda бағдарламасының арнайы ағыны аясында Жасанды интеллект және Game Development бағыттары бойынша қарқынды оқытудан өтеді.

Оқыту «Тренерлерді дайындау» (ToT) жүйесі бойынша ұйымдастырылған, бұл оқытушыларға тек теориялық негіздерді меңгеріп қана қоймай, оларды практикада қолдануға мүмкіндік береді. Бағдарлама оқытушылардың біліктілігін арттыруға бағытталған, осылайша олар студенттерге білімді тиімді түрде жеткізе алады.

«Бұл бастама 2023 жылы өткен Digital Bridge Халықаралық форумының қорытындысы бойынша Қазақстан Республикасы Президентінің тапсырмасына сәйкес іске асырылуда, онда жоғары оқу орындарында жасанды интеллект саласындағы пәндердің мазмұны мен оқыту әдістерін жаңарту ұсынылған болатын. Бағдарлама аясында 650 оқытушы Жасанды интеллект бағытында, ал 50 — Game Development бағытында оқытылатын болады. Оқытуды өткізу үшін 7 қазақстандық IT-мектеп таңдалды. Сабақтар онлайн және офлайн сабақтарды, сондай-ақ IT-мектептер платформаларында оқу материалдарына қол жеткізуді қоса алғанда, аралас форматта өтеді», — деп атап өтті ҚР Цифрлық даму, инновациялар және аэроғарыш өнеркәсібі министрі Жаслан Мадиев.

Бағдарлама аптасына кемінде екі сабақтан тұрады, әрқайсысы 90 минуттан, және әр топта 25 адамға дейін қатысушылармен міндетті өзара іс-қимылды қамтиды. Оқыту тілдері — қазақ және орыс тілдері, барлық материалдар, оның ішінде бейнесабақтар екі тілде ұсынылатын болады.

«Жасанды интеллект» бағыты бойынша оқу бағдарламасы Prompt engineering, Data analytics, Data Science және Computer Vision бойынша кіріспе курсты қамтиды. Ал, ілгері курс жасанды интеллект, табиғи тілді өңдеу (Natural Language Processing) және тереңдетіп оқыту (Deep learning) тақырыптарын қарастырады. Game Development бағыты геймдизайнның негіздері, компьютерлік графика, модельдеу және текстуралау, риггинг, анимация және ойындардағы UI/UX негіздері, сондай-ақ ойын әзірлеуді қамтиды.