2024 жылғы 1 қазанда Қазақстан Республикасының Президенті Қасым-Жомарт Тоқаевтың Жарлығына сәйкес, Абай облысының спортшылары V Дүниежүзілік көшпенділер ойындарында қол жеткізген табыстары үшін мемлекеттік наградалармен марапатталды. 

Бұл ойындар Қазақстанның ұлттық спорт мәдениетін халықаралық аренада танытып, халқымыздың ежелгі дәстүрлерін дәріптеген маңызды оқиға болып табылады. 

Абай облысының жеңімпаз спортшылары елдің намысын жоғары деңгейде қорғап, ерекше жетістіктерге жеткені үшін арнайы құрметке ие болды. Мемлекеттік марапаттар алған спортшылар қатарында қазақ күресінен V Дүниежүзілік көшпенділер ойындарының алтын медаль иегері Дидар Тұқышов пен Роза Нысантайқызы – ұлттық спорт түрлерінен көрсеткен ерекше жетістіктері үшін «Ерен еңбегі үшін» медалімен марапатталды. 

Қазақ күресінен V Дүниежүзілік көшпенділер ойындарының жеңімпазы Зарина Сарипова мен кураш күресінен қола медаль иеленген Ерзат Арғыновқа Қазақстан Республикасы Президентінің Құрмет грамотасы табыс етілді. 

Ал арқан тартыстан күміс медаль иеленген Әйгерім Жұманова мен құсбегіліктен күміс жүлде олжалаған Ерзат Байқадамов Президенттің Алғысына ие болды. Бұл алғыс олардың кәсіби шеберлігін, күш-жігерін және көшпенділер ойындарында ел атын асқақтатқаны үшін берілді.

Сондай-ақ, Ақсуат ауданы, Екпін ауылының тумасы қазақ күресінен V Дүниежүзілік көшпенділер ойындарының жеңімпазы Мейіржан Берекетовке де «Ерен еңбегі үшін» медалі тапсырылды.

Абай облысының спортшыларына берілген бұл марапаттар олардың жоғары деңгейдегі спорттық жетістіктерін мойындап, алдағы уақытта да еліміздің дамуына өз үлесін қосуға ынталандырады. Көшпенділер ойындары – тек спорттық жарыс қана емес, ұлттық құндылықтарды, мәдениет пен дәстүрлерді сақтап, келесі ұрпаққа жеткізудің маңызды алаңы. Олардың жетістіктері елдің рухани және мәдени құндылықтарын сақтап, спортты дамытудағы қызметінің маңызды екенін дәлелдейді.