Техникалық және кәсіптік, сондай-ақ орта білімнен кейінгі білім беру ұйымдарының педагогтары арасында «Шаштараз өнері» құзыреттілігі бойынша I республикалық кәсіби шеберлік байқауының жеңімпаздары анықталды. Байқау халықаралық WorldSkills стандарттарына сәйкес өтті. Техникалық және кәсіптік білім беру жүйесіндегі шығармашыл, дарынды мұғалімдерді анықтауға, әрі қолдауға, сондай-ақ үздік педагогикалық тәжірибені таратуға бағытталған.

Байқау барысында мұғалімдер өздерінің кәсіби шеберліктерін, шығармашылық қабілеттерін дамытудың жаңа әдістерін көрсетті. Екі күн ішінде қатысушылар 4 практикалық тапсырма орындап, шеберліктерін, шығармашылық және техникалық дағдыларын паш етті.

«Өз ісінің үздік маманы» аталымы бойынша жеңімпаздар: Кенжебек Каденов – Астана қаласы, Технология колледжі, Аксана Клименко – Павлодар облысы, Қызмет көрсету саласы колледжі, Тұрсын Жамекова – Ақтөбе индустриялық технологиялар колледжі. «Жеңіске деген жігер» номинациясын Орал қаласындағы сервис және технология колледжінен келген Гүлайпаш Уразова иеленді.

I Республикалық кәсіби шеберлік байқауының жеңімпаздары: ІІІ орын – Ахмедова Алена – Талдықорған сервис және технология колледжі, ІІ орын – Аружан Абдыбек – Алматы сән және қызмет көрсету колледжі, І орын – Наталья Киселева – Абай облысы, Бизнес және сервис жоғары колледжі.

Биыл шара облысымызда алғаш рет ұйымдастырылды. Оған еліміздің 15 облысынан 36 үміткер бақ сынасты.