Аягөз гарнизоны 10810 әскери бөлімінің мәдени демалу орталығында  Аягөз қаласындағы № 6 мектептің 5 сынып оқушылары «Жас сарбаз» әскери-патриоттық клубының қатарына өтуге салтанатты түрде ант қабылдады. Іс-шара танк әскери бөлімі мен № 6 мектеп арасындағы өзара ынтымақтастық меморандумы аясында өтті.

Ант қабылдау рәсіміне Ауған соғысының және ҚР ҚК ардагерлері, аудандық Қорғаныс істері жөніндегі біріктірілген бөлімінің қызметкерлері мен мектеп директоры және ата-аналар, оқушылар қатысты. 

Аталмыш шарада «Жас сарбаз» клубының 20-ға жуық тәрбиеленушісі көпшілік алдында Қазақстан Республикасының Ата заңы мен басқа да заңдарын қатаң сақтауға, патриоттық рухты биік қойып, Отанды қорғауға, оның мүдделерінің ержүрек әрі батыл қорғаушысы болуға уәде берді. Сонымен қатар, осы шараға арнайы келген қонақтар ант қабылдаған оқушыларға «Жас сарбаз» ұйымының тәрбиеленушісі екендігін растайтын куәлікті табыс етті.

«Жас сарбаз» әскери-патриоттық клубының мақсаты – өскелең ұрпаққа әскери-патриоттық тәрбие беру, олардың Отанға деген сүйіспеншілік сезімін ояту болып табылады. Осындай патриоттық клубтар балалардың ҚР Қарулы Күштеріне деген құрметін, әскери борышты өтеуге және жасөспірімдерді жанжақты әскерге дайындауға жігерлендіреді.

Салтанатты шара барысында сөз алған Аягөз аудандық білім бөлімінің басшысы Нұрғали Әзімбаев оқушыларды құттықтап, «Жас сарбаз» балалар мен жасөспірімдер әскери-патриоттық қозғалысы өңірде өскелең ұрпақ бойында ұлттық рухты қалыптастыру, әскери патриоттық тәрбиені жандандыру ісін мықтап қолға алып келе жатқанын баяндады. Сондай-ақ, мекткеп директоры Жанар Сапакова мен Ауған соғысының ардагерлері және 10810 әскери бөлімінің штаб бастығы Асылбек Унтаков балаларға жүрек жарды лебіздерін білдірді.

Шара соңы мектеп оқушылары мен 10810 әскери бөлімінің көркемөнерпаздары және Айгерім би тобының мерекелік концертіне ұласты.