Абай облысында «Жас сарбаз» әскери патриоттық қозғалысы тәрбиеленушілері арасында республикалық «Jas Sarbaz Chess Cup» шахмат турнирінің облыстық кезеңі өткізілді. Әлихан Бөкейхан Уиниверситетінің Әскери кафедрасында өткен шахмат сайысы қазақтың даңқты ұлы, Халық қаһарманы Рахымжан Қошқарбаевтың 100 жылдығына арналды. 

Сайыс алдында қатысушылар Халық қаһарманы Рахымжан Қошқарбаевты бір минуттық үнсіздікпен еске алып, майдангер туралы қысқаша деректі фильм көрді. 

Турнирдің ашылу салтанатында Абай облысы білім басқармасының «Дарындылық пен қосымша білім беруді дамытудың облыстық ғылыми әдістемелік «Дарын орталығы» мекемесінің директоры Светлана Оспанова,    Әлихан Бөкейхан Уиниверситетінің Әскери кафедрасының бастығы полковник Мұрат Егенбердиев, Ауған соғысы ардагері Айдар Манасов және «Дарын» орталығының әскери-патриоттық бағытты дамыту бөлімінің басшысы Болат Құрманов сөз алып ақыл-ой бәсекесіне қатысушыларға сәттілік тіледі.

Шара швейцарлық жүйе бойынша 7 турдан тұрды. Турнирге облыстың аудандары мен қалаларынан 12 мен 16 жас аралығындағы бір ұл мен бір қыз бала «Жас сарбаз» әскери-патриоттық қозғалысының тәрбиеленушілері қатысты.

Шахмат турнирінің басты мақсаты – өскелең ұрпақ арасында спортты, салауатты өмір салтын, шахмат ойынын насихаттау. Бұған қоса дарынды жас шахматшыларды анықтап, Республикалық «Jas Sarbaz Chess Cup» шахмат турниріне іріктеу. 

Турнир қорытындысы бойынша Аягөз қаласының командасы қарсылас шақ келтірмей жеңімпаз атанды. Солардың бірі Аягөз ауданы, Ақши ауылының 9-сынып оқушысы Шырын Нұржанқызы. 7 жасынан шахмат ойынына әуестенген ол бұл жарыста мықты деген қарсыластарын ұтып, жеңіске жетті. Дегенмен де осал ойыншылардың болмағанын, әркімнің өз тактикасы барын жеткізген Шырын болашағын осы шахмат ойынымен байланыстырады. 

«Жас сарбаз» әскери патриоттық қозғалысы тәрбиеленушілері арасындағы республикалық «Jas Sarbaz Chess Cup» шахмат турнирінің облыстық кезең қатысушылары грамоталар мен медальдармен марапатталды. Облыстық кезеңнен іріктелгендер енді республикалық жарсықа қатысып, бақтарын сынамақ.

Абай өңірлік гарнизонының баспасөз қызметі