Есілдің ен бойына екі күн бойы жыр жаудырып, астаналық ағайынның арқасын шымырлатқан шын жүйріктер додасы мәресіне жетті. 

Еңбек адамының ерен ісін мадақтап, елдік мұраттарды бәрінен биік көтерген байрақты бәсеке аса тартысты өтті. Сөз зергерлері зиялы ой, зияткер пікірлерімен айтыстың асқар биігін тағы айғақтады. 

Жалпы, Мемлекет басшысы елдің мәдени мұраларын сақтап, рухани дүниетанымын өркендету ісіне зор мән беретінін білесіздер. Ал, Айтыс – руханиятымыздың ең асыл қазынасының бірі. Бұл даусыз. 

Осы «Алтын домбыра» жылдың қорытынды айтысының алдында Халықаралық айтыс ақындары мен жыршы термешілер одағының қорытынды жиналысы өтіп, әр өңірден келген филиал басшылары есеп беріп, жиналыс соңында айтыс өнеріне орасан зор үлес қосқаны біршама ақындар мәдениет министрлігінің марапатын алды. Соның ішінде, өңіріміздегі айтыс өнерінің дамуына елеулі еңбек етіп жүрген ақын, ұстаз Дәметкен Омарбаева «Еңбек ардагері» медалімен, айтыскер ақын, ұстаз, халықаралық айтыс ақындары мен жыршы термешілер одағының Абай облысы филиалының төрағасы Дәулет Сметов «Мәдениет саласының үздігі» медалімен марапатталды.