«ҚазАвтоЖол» ұлттық компаниясы еліміздегі ең ірі «Талдықорған – Қалбатау - Өскемен» республикалық автомобиль жолын қайта жаңарту бойынша негізгі жұмыстардың аяқталғандығын жариялады. 

Қайта жаңарту жұмыстары жолдың 287-1013 шақырым аралығында жүргізілген. Жалпы ұзындығы 768 шақырымнан тұрады. Оның  38 шақырымы І техникалық санатқа, 730 шақырымы ІІ техникалық санатқа ауыстырылды.

Жол құрылысы Абай, Жетісу және Шығыс Қазақстан облыстарының аумағында 16 учаскеде жүргізілген. Жолды салуға 27 млн текше метр жер төсемі пайдаланылып, 768 шақырым аралықта қиыршық тасты-мастикалық асфальтбетон жабыны салынған.

«Талдықорған – Қалбатау - Өскемен» тас жолында 54 көпір, 6 көлік айрығы мен 745 су өткізгіш құбыр орнатылып, демалыс алаңдарында мобильді санитарлық-гигиеналық кешендер салынды. Бұл жұмыстарға 1812 бірлік арнайы техника мен 2788 жұмысшы маман жұмылдырылды. Нәтижесінде Талдықорған қаласынан Өскемен қаласына дейін 768 шақырым аралықта толық көлік қозғалысы қамтамасыз етілді.