Абай облысының әкімі Нұрлан Ұранхаев Курчатов қаласына жасаған жұмыс сапарының аясында бірнеше әлеуметтік маңызы бар нысанда болып, құрылыс және қалпына келтіру жұмыстарының барысын тексерді.

Аймақ басшысының алдымен аялдағаны - балалар мен жасөспірімдер шығармашылығы үйінің ғимараты. Қала әкімі Болат Әбдіралиев жобаның атқарылуы мен аяқталуы туралы баяндады. Осыған дейін балалар мен жасөспірімдердің шығармашылықпен айналысатын орындары тарлық ететін. Ал жаңа ғимараттың бұған дейін қараусыз тұрғанын айта кеткеніміз жөн. Соңғы уақытта қалада бос тұрған ғимараттарды қалпына келтіру жұмысы жанданып, шаһардың архитектуралық келбетіне қан жүгіре бастады.

Бүгінгі таңда балалар мен жасөспірімдердің шығармашылық үйінде робототехника, тігіншілік, би, қыш өнері, ойын техникасы сынды үйірмеден бөлек акт залы бар. Қажетті құрал-жабдықтар алынды. Көктемде ғимарат ауласын абаттандыру жұмысы басталады.

Атқарылған жұмыстарды көрген аймақ басшысы жастар бас қосатын тағы бір ғимаратты күрделі жөндеуден өткізу керектігі туралы тапсырма берді. Сондай-ақ, қала әкімінің өтінішіне орай шаһардағы мектеп ауласына спорт алаңын салуға байланысты облыстық Білім басқармасының басшысы Нұржан Ахметқалиевке міндет жүктеді.

Өңір басшысы сондай-ақ дене шынықтыру-сауықтыру кешенінің құрылысы алаңына да барды. Жаңа спорт кешені заманауи стандарттарға сай болады. Сонымен бірге барлық жастағы адамдарға, соның ішінде мүмкіндігі шектеулі азаматтарға да қолжетімді болмақ.

Қаланы жылумен қамту мәселелері де әкім назарынан тыс қалған жоқ. №1 қазандық 30 көпқабатты тұрғын үйді жылумен қамтамасыз етеді. Өткен жылы қазандықтағы 4 пешке ағымдағы жөндеу жүргізіліп, 2 ескі пеш ауыстырылды. Сонымен қатар, қосымша 2 пеш орнатылған. Курчатов қаласында 4 қазандық бар. Олар 79 тұрғын үйге, 20 мемлекеттік мекемеге, 24 заңды тұлғаға қызмет көрсетеді.

Курчатовта көп жыл қараусыз, бос тұрған көпқабатты үйлер де біртіндеп қалпына келтірілуде. Солардың біріндегі мердігерлік жұмыстарды «Кентавр-Құрылыс» ЖШС атқаруда. Жұмысты аяқтау 2025 жылдың сәуіріне жоспарланған. Қазіргі таңда қала бойынша 2 көпқабатты түрғын үйді қалпына келтіру жұмысы жүруде. Жоспарда тағы 5 үй бар. Баспана кезегінде тұрғандар саны 236 адам. Олардың арасында мемлекеттік қызметкерлер, көпбалалы отбасылар, жетім балалар бар. Аймақ басшысы қалпына келтірілетін үйлердің сапасына ерекше мән беріп, заманауи үлгіде болуына көңіл аудару керектігін айтты.