«Семей қаласының орталықтандырылған кітапхана жүйесі» КММ-нің Цемент кентіндегі кітапхана-бөлімшесінде жұмысшы мамандықтар жылы аясында «Болашақ - жұмысшы жастардың қолында» атты Pecha Kucha өткізілді.

Іс-шараға «Семей Геологиялық Барлау» колледжінің маманы, Кәсіптік бағдар беру және жұмысқа орналастыру бөлімінің менеджері Маржан Жумагалиевна Жангельдина мен №32 мектептің 8 «А» сынып оқушылары қатысты.

Шара барысында кітапхана қызметкері қатысушыларға Президентіміздің 2025 жылды «Жұмысшы мамандықтары жылы» деп жариялағанын айтып, Мемлекет басшысы Қазақстан халқына Жолдауын жариялау барысында кәсіптік-техникалық білім беруді реформалаудың маңыздылығы, сондай-ақ, еңбек адамының мәртебесін көтеру мәселесі туралы айтқанын жеткізді.

Pecha Kucha шарасы М.Ж.Жангелдинаның сөзімен жалғасып, ол оқушылардың назарына геологиялық барлау колледжінде оқытылатын мамандықтар туралы қызықты ақпараттар ұсынды, слайд-тұсаукесерді пайдалана отырып, жаңа кен орындарын іздеуге бағытталған жұмыстарды орындайтын геофизик, сондай-ақ инженер-геофизик мамандықтары туралы ақпарат беріп өтті.

Оқырмандар шарада ұйымдастырылған ойындар мен викторинаға белсенді қатысты. «Қазіргі мамандықтар әлемі» викторинасында соңғы уақытта пайда болған мамандықтар туралы жұмбақтар жасырылды. «Жұмбақ сөз» ойынында шифрланған мамандықтар жасырылған карталар ұсынылды. Оқырмандар кәсіп атауларын тауып, тапқырлық танытты.

Іс-шара соңында оқушылар қандай мамандықты оқығысы келетіндері, қандай мамандық таңдайтындары туралы ойларымен бөлісті.

Сонымен қатар, Жоламан кентінің кітапхана-бөлімшесінде жұмысшы  мамандықтарының жылы аясында «Жұмысшы мамандығы туралы» атты тақырыптық кеш өткізілді.

Шараға аспазшы мамандығын оқытатын Қызмет көрсету саласы колледжінің оқытушысы Ильдар Фатихович Каримов, №1 қалалық аурухананың сантехнигі Бекен Рымгалиевич Акимбеков, №48 орта мектептің кітапхана қызметкері Диляра Айткалиевна Сапина, кітапхана оқырманы Айне Сайгумаровна Каржасова мен әртүрлі еңбек салаларында жұмыс істейтін жұмысшы мамандары және №48 мектептің 8 сынып оқушылары қатысты.

Шара басын кітапхана қызметкері «Экономиканың өсуін қамтамасыз ету - біздің басты міндетіміз. Бүгінде елімізде техникалық мамандар – инженерлер, энергетиктер, су шаруашылығы мамандары, агрономдар, ветеринарлар және басқа да маңызды мамандықтардың өкілдері сұранысқа ие» деген мемлекет Басшысы Қасым-Жомарт Тоқаевтың «Ана тілі» газетіне берген сұхбатымен ашты.

Әрі қарай, кітапхана қызметкері бүгінгі шарада түрлі мамандықтағы адамдармен кездесіп,  олар өздері туралы, өз мамандықтарына қалай келгендері, мамандық таңдауына кім әсер еткені және мамандығының қоғамға қандай пайда тигізетіндігі туралы айтуға келгендерін атап өтті.

Кеш еңбек нарығында аспаз мамандығының сұранысқа ие екендігін және оны әрбір адамның меңгере алатынын атап өткен Гульдирай Баймуратовна Шаймуратованың сөзімен жалғасты.

Іс-шара қонағы сантехник мамандығының иесі Бекен Рымгалиевич Акимбеков  қазіргі уақытта санитарлық-техникалық жабдықтарды жөндеумен айналысатын адамның слесарь-сантехник деп аталатынын, бір қарағанда, өз мамандығы маңызды емес сияқты көрінгенімен, алайда, шын мәнінде сумен жабдықтау, кәріз жүйелері, сондай-ақ қалада немесе кәсіпорында,  ұйымдардағы жылыту жүйелерінің дұрыс жұмыс істеуі сауатты кәсіби маманның көмегімен жүзеге асырылатынын атап өтті.

Тақырыптық кеш барысында қатысушылар түрлі мамандықтар туралы пайдалы ақпарат алды, мамандықтар туралы қажетті мәліметтерді көркем әдебиеттен, газеттерден, журналдардан, телешоулардан және кинофильмдерден алуға болатындығы айтылды.