Бөгеттер құрылысы мен қар тазалау жұмыстары жалғасуда
Семей қаласына жұмыс сапарымен ҚР Президенті Әкімшілігінің мемлекеттік инспекторы Батыржан Байжұманов келіп, қала әкімі Талғат Мұратов және бөлім басшыларымен бірге су тасқынына қарсы іс-шаралардың орындалуын тексерді.
Алғашқы нысан – Шығыс кентіндегі бөгет құрылысы. Осыған дейін кент тұрғыны әкімнің жеке қабылдауында осы мәселені көтерген болатын. Қала басшысы жағдайды өз көзімен көріп, бөгет салуға тапсырма берген еді. Бүгінде бөгет құрылысы аяқталды. Келесі нысан – Суық бастау кентіндегі ұзындығы 1200 метрді құрайтын қорғаныс бөгетінің құрылысы болды. Коммуналдық қызметтер тұрғын үйлерді су басу қаупін азайту үшін қорғаныс үйінділерін салу жұмыстарын жүргізуде.
«Бөгет құрылысы аяқталуға жақын. Сонымен қатар, қар тазалау және шығару жұмыстары тәулік бойы жалғасуда. Көктемгі су тасқынының алдын алу шаралары толық көлемде жүзеге асырылуда», – деді қала әкімі.
Сроства, Қазкрай, Затон, Юность және Шығыс кенттері мен аудандарында қар тазалау және шығару жұмыстары жүргізілуде. Бұл аумақ су басу қаупі жоғары аймақтар қатарында.
Учаскелерді нығайту мақсатында 1000 дана қап инертті материал (құм және саз) дайындалды. Көктемгі су тасқынының алдын алу және тұрғындарға қолайлы жағдай жасау үшін қар тазалау және шығару жұмыстары жалғасады.