Қазақстан Республикасы Парламенті Сенатының депутаттары Наурызбай Байқадамов пен Жанболат Жөргенбаев ТМД Парламентаралық Ассамблеясы мен ҰҚШҰ Парламенттік Ассамблеясының халықаралық байқаушылар тобының жұмысына қатысты. Сенаторлар Тәжікстан Республикасындағы Оли Мәжілісі Намояндагон Мәжілісінің депутаттарын сайлауға дайындық және оның өткізу барысына мониторинг жүргізді.

Сенаторлар байқау барысында сайлау үдерісі ұлттық заңнама мен халықаралық стандарттарға сәйкес өткенін атап өтті. Олар сайлаудың ұйымшылдықпен өткені мен азаматтардың белсенді қатысқанын және дауыс берудің ашықтығын атап өтті.

«Бүгін біз Тәжікстан Парламентіне сайлау өтіп жатқанын көріп отырмыз. Біз ашылу салтанатына қатыстық, қазірдің өзінде оннан астам учаскеде болып, халықтың сайлауға өте белсенді қатысқанына куә болдық. Тұрғындардың сайлауға қатысу деңгейі өте жоғары. Сайлау саласындағы барлық талаптар мен ережелер және заңнама баптары бұлжымай сақталды», - деп атап өтті сенатор Жанболат Жөргенбаев.

Қазақстандық сенаторлардың халықаралық байқаушылар миссиясына қатысуы парламентаралық ынтымақтастықты нығайтуға және сайлау процестері саласында тәжірибе алмасуға ықпал етеді. Бұл Қазақстан Республикасының демократиялық даму және халықаралық өзара іс-қимыл қағидаттарына адалдығын нақтылайды.