Мемлекет басшысы Қасым-Жомарт Тоқаев Ұлттық құрылтайдың төртінші отырысында туризм мәселесін көтеріп, оның аймақтық дамуға серпін беретін салаға айналуы керектігін атап өтті. 

Президенттің бұл пікірі аясында Абай облысының туризм саласын дамыту жолында жүргізіліп жатқан шаралардың маңыздылығына тоқталуды жөн көрдік.

Абай облысының әкімі Берік Уәли жуырда облыста Туризм басқармасы құрылатынын мәлімдеді. Бұл шешім өңірдің туристік инфрақұрылымын жүйелі түрде дамытуға, ішкі және сыртқы туризмнің өркендеуіне серпін берері сөзсіз. Өңірдің ең басты туристік нысандарының бірі – Алакөл көліне деген сұраныс жылдан жылға артып келеді. Бұл тенденция облыс үшін үлкен мүмкіндіктерге жол ашады.

Осы бағытта Абай облысының әкімі Мақаншы ауданына жасаған сапары барысында Алакөл көлінің жағдайымен танысып, туристік маусымға дайындық жұмыстарын пысықтады. Алакөлдің инфрақұрылымын жақсарту мақсатында заманауи қоқыс жәшіктерін көбейту, қоғамдық әжетханалар санын арттыру, жағалауды абаттандыру, емдік балшық аймағын ретке келтіру, балаларға арналған ойын алаңдарын салу, өрт қауіпсіздігін күшейту және жаңа арбат салу секілді маңызды бастамалар қолға алынуда. Бұл жұмыстар демалушылар үшін қолайлы жағдай жасап, туристердің санын одан әрі арттыруға мүмкіндік береді.

Бұдан бөлек, Абай облысының бірегей табиғи және тарихи-мәдени мұраларын қамтитын бірнеше туристік бағыттар бар. Солардың қатарында Бесқарағайдағы Шошқалы көлі, Абай ауданындағы Қоңыр әулие үңгірі, Жидебайдағы «Абай-Шәкәрім» кесенесі, Ақшоқыдағы Құнанбай қорымы, Бөрілідегі Мұхтар Әуезов мұражайы, Үржар ауданындағы «Тарбағатай» ұлттық паркі, Аягөз ауданындағы «Қозы Көрпеш – Баян сұлу» мазары, Мақаншыдағы «Барлық Арасан» шипажайы және Шүлбі су қоймасы бар. Бұл туристік нысандар тек ішкі ғана емес, халықаралық деңгейдегі туристердің де қызығушылығын тудыруы мүмкін.

Туризмді дамытудың маңызды аспектілерінің бірі – мамандарды даярлау және сервистің сапасын жақсарту. Облыстағы туристік кәсіпкерлікті қолдау, инфрақұрылымды дамыту және экотуризмді ілгерілету арқылы өңірдің экономикалық және әлеуметтік дамуын жеделдетуге болады. Сонымен қатар, Абай облысының табиғи байлығын сақтау және биологиялық әралуандылығын қорғау да басым міндеттердің бірі болып табылады.

Қорыта айтқанда, Абай облысы туризм саласында жоғары әлеуетке ие. Өңірдегі туристік нысандарды дамытуға бағытталған кешенді шаралар, мемлекеттік қолдау және жергілікті биліктің белсенді жұмысы арқасында Абай облысы Қазақстанның маңызды туристік орталықтарының біріне айнала алады. Бұл бағытта атқарылып жатқан жұмыстар туризмді экономиканың жетекші салаларының біріне айналдыруға мүмкіндік береді.