Сенаттың Аграрлық мәселелер, табиғатты пайдалану және ауылдық аумақтарды дамыту комитетінің мүшелері ауыл шаруашылығы, цифрлық даму, инновациялар және аэроғарыш өнеркәсібі министрліктерінің басшылығымен кездесу өткізді. Агроөнеркәсіп кешеніне цифрлық технологияны енгізу және олардың ауыл шаруашылығының дамуына әсері талқылаудың басты тақырыбы болды.

Министрліктердің өкілдері кездесу барысында АӨК цифрландырудың ағымдағы жай-күйі туралы, оның ішінде ауыл шаруашылығы жерлеріне спутниктік мониторинг, фермерлерге арналған автоматтандырылған бақылау жүйелері мен онлайн-сервистерді енгізу туралы хабардар етті. Ауыл шаруашылығы жерлерін пайдалануды бақылауға және олардың тиімсіз пайдаланылуын болдырмауға мүмкіндік беретін «Жер инспекторы» жобасына ерекше назар аударылды. Сондай-ақ жайылымдар мен егіс алқаптарының жай-күйін және өнімділік болжамын көрсететін ауыл шаруашылығы алқаптарының ғарыштық мониторингінің нәтижелері қаралды. Депутаттар деректердің ашықтығы мен олардың ауыл шаруашылығы өндірушілеріне қолжетімділігінің маңыздылығын атап өтті. Ол фермерлер жұмысының тиімділігін арттыруға және бюрократиялық кедергілерді төмендетуге ықпал етеді.

Ауыл шаруашылығында жасанды интеллекті енгізудің келешегі талқылаудың жеке тақырыбы болды. Цифрландыру министрінің орынбасары Дмитрий Мун топырақты интеллектуалды талдау жүйесіне дрондарды пайдалану және субсидия алу процесін жеңілдету үшін чат-боттарды іске қосу жоспарларын ұсынды. Кездесуге қатысушылардың пікірінше, мұндай технологиялар өнімділікті арттыруға және фермерлердің шығындарын азайтуға көмектеседі.

Депутаттар кездесу қорытындысы бойынша ауыл шаруашылығындағы заманауи технологияларды қолдау үшін АӨК-ні цифрландыру және заңнаманы жетілдіру жөніндегі жұмысты жалғастыру қажеттігін атап өтті. Сарапшылар мен агробизнес өкілдерінің қатысуымен талқылаулар өткізу туралы шешім қабылданды.