Парламент Сенатының Төрағасы Мәулен Әшімбаев Қазақстанға ресми сапармен келген Словения Президенті Наташа Пирц-Мусармен кездесті. Сұхбат кезінде тараптар екі елдің ынтымақтастығына қатысты мәселелерді талқылады. Сондай-ақ парламентаралық байланысты нығайту барысы әңгімеге арқау болды.

Палата Спикері Словения Қазақстанның Еуропалық Одақтағы сенімді және маңызды серіктестерінің бірі екенін атап өтті. Сонымен қатар Мәулен Әшімбаев парламентаралық деңгейде, оның ішінде халықаралық ұйымдар аясында өзара іс-қимылды одан әрі арттырудың маңызды екенін айтты.

«Бүгін Қазақстан Президенті Қасым-Жомарт Кемелұлы Тоқаевпен нәтижелі және мазмұнды кездесу өткіздіңіздер. Білім беру, туризм, сауда-экономикалық қатынастар саласында бірқатар маңызды құжаттарға қол қойылды. Сенат қол жеткізілген уағдаластықтарды тиімді іске асыру үшін өз тарапынан қажетті жұмыстарды жүргізуге дайын. Екіжақты қарым-қатынасты дамыту жолында парламентаралық байланыстар да үлкен рөл атқарады. Біздің Парламенттің екі Палатасында да Словениямен достық топтары жұмыс істейді. Словения Парламентінде де осындай құрылым құру екіжақты өзара іс-қимылды тереңдетіп, өзара серіктестігімізді арттыруға өз ықпалын тигізер еді. Біз Словения Парламентімен ынтымақтастықты кеңейтуге және нығайтуға мүдделіміз», – деді Мәулен Әшімбаев.

Кездесу барысында халықаралық және өңірлік күн тәртібіндегі өзекті мәселелер де назардан тыс қалған жоқ. Бұдан басқа, іскерлік байланыстарды ілгерілетуге, сауда-экономикалық және мәдени-гуманитарлық ынтымақтастықтың келешегіне, сондай-ақ, орнықты дамуға, экологияға және экожүйелерді қорғауға баса мән берілді.

Сенат Спикері өз сөзінде Қазақстан Президенті Қасым-Жомарт Тоқаевтың бастамасымен қолға алынған реформаларды жүзеге асыру жолында Палата атқарып келе жатқан заңнамалық жұмысқа да тоқталды. Оның ішінде елдің саяси жүйесін демократияландыру жөніндегі шаралар және адам құқықтары мен гендерлік теңдікті қорғау саласын нығайтуды көздейтін жаңа бастамалар бар.

Палата Төрағасы Әлемдік және дәстүрлі діндер көшбасшылары Съезінің қызметіне де назар аударып, Словенияның дін қайраткерлерін 2025 жылғы 17-18 қыркүйекте Астанада өтетін «Ддіндер диалогы: болашақ жолындағы синергия» атты VIII Съезге шақырды.

Өз кезегінде Словения Президенті Қазақстанда жүргізіліп жатқан қоғамдық-саяси өзгерістерді жоғары бағалады және екіжақты байланыстарды одан әрі нығайтуға практикалық тұрғыдан ықпал етуге дайын екенін жеткізді.