Ауыл шаруашылығы министрі Айдарбек Сапаров итальяндық «TRAMITE Group» компаниясының негізін қалаушы Джанантонио Траметпен кездесті. Тараптар жетекші итальяндық брендтер үшін қызанақ өсіру және өңдеу жобасын талқылады.

Айдарбек Сапаров Мемлекет басшысының өңделген өнім үлесін 70%-ға дейін арттыру жөніндегі тапсырмасы аясында Қазақстанда барлық қажетті шаралар қабылданып жатқанын атап өтті.

Әсіресе, жаңа және жұмыс істеп тұрған өңдеу кәсіпорындарын қолдауға ерекше көңіл бөлінуде. Атап айтқанда, жаңа кәсіпорындар салу және қолданыстағыларын жаңғырту кезінде салынған инвестицияның 25%-ын субсидиялау, айналым қаражатына арналған несиелер бойынша сыйақы мөлшерлемесін субсидиялау қарастырылған. Бұл ауыл шаруашылығы өнімдерін қайта өңдеу көлемін арттыруға ықпал етеді. Шикізат базасын дамыту үшін гербицидтерді, жанар-жағармай материалдарын, тыңайтқыштарды, тұқымдарды және ауыл шаруашылығы техникасын сатып алуға субсидиялар қарастырылған.

Өз кезегінде, Джанантонио Трамет «TRAMITE Group» компаниясы Қазақстаннан табиғи азық-түлік жеткізу бойынша серіктестерді белсенді түрде іздеп жатқанын атап өтті. Оның пікірінше, Қазақстан жоғары сапалы өнім өндіруге қолайлы климаттық жағдайлары мен табиғи ресурстары бар ел. Атап айтқанда, компания Қазақстан аумағында томат пастасы мен басқа да өнімдерді өндіруді ұйымдастыруға мүдделі.

Жыл сайын Италия 180 мың тонна томат пастасын импорттайды. Осыған байланысты, «TRAMITE Group» бұл импорттың бір бөлігін Қазақстанда және Орталық Азия елдерінде қайта өңдеуге бағыттауды қарастыруда.

Компанияның негізгі серіктесі ретінде Шардара өңірінде экспортқа бағытталған агроөнеркәсіптік кластер құру жобасының бастамашысы болып табылатын қазақстандық «Agriqa Farms» ЖШС таңдалды.

Жобаны жүзеге асыру аясында 2025 жылдың мамыр айында 22 га аумақта жылыжай кешенінің құрылысы басталады. Сонымен қатар, тәулігіне 3360 тонна шикізат өңдейтін томат пастасы зауыты, сағатына 30 тонна өнім шығаратын жоңышқа түйіршіктеу зауыты, тәулігіне 200 тонна жеміс-көкөніс шикізатын кептіру және мұздату комбинаты, сондай-ақ 20 мың тонна жеміс-көкөніс сақтайтын қойма мен 10 мың тонна сыйымдылығы бар тоңазытқыш кешені салу жоспарланған.

2026 жылдан бастап 8 мың га алқапқа тамшылатып суару жүйесін орнату жұмыстары басталады. Жобаның жалпы инвестиция көлемі 100 миллион АҚШ долларын құрайды.

«Біз өңдеу саласындағы ірі жобаларға мүдделіміз және олардың табысты жүзеге асырылуына жан-жақты қолдау көрсетуге дайынбыз», — деп түйіндеді Айдарбек Сапаров.