Облыс әкімі Берік Уәлидің төрағалығымен кеңейтілген аппараттық жиын өтті. Қала және аудан әкімдері бейне режимде қатысқан отырыста Семей қаласын жылумен жабдықтау, тұрғын үй құрылысын қолданысқа беру, әлеуметтік-экономикалық даму көрсеткіштері бойынша хаттамалық тапсырманың орындалу барысы қаралды.

Энергетика және тұрғын үй-коммуналдық шаруашылық басқармасы, Құрылыс басқармасы, Экономика және бюджеттік жоспарлау басқармасы басшылары мен Семей қаласының әкімі баяндама жасады.

Биыл Семейдегі жылу желілерін жаңғырту үшін жалпы құны 6,6 млрд.теңгені құрайтын 6 жобаны іске асыру жоспарланған. Бұл жобалар жүзеге асырылса облыс орталығындағы жылу желілерінің тозуы 61,5% - дан 58,1% - ға дейін төмендейді деп күтілуде.

Семей қаласында 21 жылу қазандығы мен №1 Жылу электр орталығы шаһарды жылумен қамтамасыз етеді. 2024 жылы жылу көздері мен желілерін жөндеуге 2,5 млрд теңге бөлініп, ЖЭО-1 және 9 қазандықта жөндеу жүргізілді. 2025 жылы бұл бағыттағы жұмысты жалғастыруға «Теплокоммунэнерго» кәсіпорнынан 2 млрд теңге қарастырылған. Қаланың оң және сол жағалауындағы қуат тапшылығын азайту үшін қосымша қазандықтар мен жылу магистральдарын салу қажеттігі туындап отыр.

Аймақ басшысы Семей қаласының жылу инфрақұрылымын жаңарту басым бағыттардың бірі екенін атап өтті.

Аймақ басшысы осы салаға жауапты орынбасары, тиісті басқарма басшылары мен қала әкіміне жылу тапшылығы мен технологиялық бұзушылықтарға талдау жасап, нақты ұсыныстар әзірлеуді тапсырды. Кредиторлық және дебиторлық берешекті азайту бойынша тиісті шаралар қабылдауды жүктеді.