2025 жылдың 1 сәуірінде Қазақстан Республикасы Техникалық реттеу және метрология комитетінің төрағасы Жанна Есенбекова Ресей Федерациясы Техникалық реттеу және метрология федералды агенттігінің басшысы Антон Шалаевпен кездесу өткізді. Кездесу барысында тараптар тәжірибе алмасу, стандарттау және метрология саласындағы мамандардың біліктілігін арттыру, сондай-ақ екі ел арасындағы халықаралық ынтымақтастықтың келешегі мәселелерін талқылады.

Жанна Есенбекованың сөзінше, стандарттау және метрология жүйесін жетілдіру екі ел аумағында екіжақты әріптестікті нығайту және тауарлар мен қызметтердің сапасын арттыру үшін жаңа мүмкіндіктер ашады, бұл өз кезегінде сауданы дамытуға және отандық өндірушілердің бәсекеге қабілеттілігін жақсартуға ықпал етеді.

Кездесу қорытындысы бойынша Қазақстан мен Ресей арасындағы Стандарттау және метрология саласындағы өзара іс-қимылды жақсартуға бағытталған бірқатар іс-шараларды іске асыруды көздейтін 2025-2027 жылдарға арналған бірлескен жұмыс жоспарына қол қойылды. Жоспар мамандарды оқытуды, бірлескен ғылыми-зерттеу және техникалық іс-шараларды ұйымдастыруды, сондай-ақ осы негізгі салаларға үздік тәжірибелерді енгізу бойынша жұмысты қамтиды.