Абай облысы Аягөз ауданында «Тірек мектебі: білім берудегі өзгерістерді басқару көшбасшысы» атты республикалық workshop өтті. Іс-шара Аягөз қаласындағы Қалалық көпбейінді қазақ мектеп-гимназиясында өтті. Бұл білім ордасы – биыл басталған «Ауыл мектебі – сапа алаңы» жобасына енген екі тірек мектептің бірі.

Іс-шараның басты мақсаты – ауыл мектептеріндегі білім сапасын арттыру және тірек пен шағын жинақты мектептер арасындағы әдістемелік байланысты нығайту.

Гибридті форматта ұйымдастырылған workshop-қа еліміздің барлық өңірінен 220-ға жуық білім саласының өкілдері – білім бөлімдерінің басшылары, мектеп директорлары, әдіскерлер мен пән мұғалімдері қатысты. Қатысушылар Ақмола, Ақтөбе, Алматы, Атырау, Батыс Қазақстан, Жамбыл, Жетісу, Қарағанды, Қостанай, Қызылорда, Маңғыстау, Павлодар, Солтүстік Қазақстан, Түркістан, Ұлытау және Шығыс Қазақстан облыстарынан келіп, тәжірибе алмасып, білім берудегі өзекті мәселелерді талқылады.

Пленарлық отырыста ф.ғ.к., Ы.Алтынсарин атындағы Ұлттық білім академиясының жетекші ғылыми қызметкері Алмагүл Мукушева тірек мектептердің стратегиялық маңызы мен кәсіби желілік қауымдастықтар құрудың өзектілігін атап өтті.

Workshop аясында математика, физика, химия, биология және ағылшын тілі пәндері бойынша ашық сабақтар өткізіліп, пән мұғалімдерінің тәжірибе алмасуына мүмкіндік туды. Сонымен қатар тірек және шағын жинақты мектептер арасындағы әдістемелік байланыс, «Ауыл мектебі – сапа алаңы» жобасының өңірлік тәжірибесі таныстырылды. «Біртұтас тәрбие» бағдарламасы шеңберінде оқу мен тәрбиені үйлестірудің тиімді жолдары ұсынылып, шағын мектептерге бейімделген тәсілдер талқыланды.

Сондай-ақ workshop барысында «Толық адам» іліміндегі «Мерейлі ұстаз» бейнесі қарастырылып, ұстаз тұлғасының жаңа қырлары айқындалды.