XX Халықаралық «Gylym jáne Bilim – 2025» ғылыми конференциясы аясында «Қазақстандағы және халықаралық дамудағы жастардың рөлі» тақырыбында пәнаралық ғылыми пікірталас ұйымдастырылды. Іс-шараны «Жастар» ғылыми-зерттеу орталығы мен Л.Н. Гумилев атындағы Еуразия ұлттық университеті бірлесіп өткізді.

Жиынға елдегі және шетелдік түрлі академиялық мекемелерден келген студенттер, магистранттар, докторанттар мен жас ғалымдар қатысты.

Пікірталаста сарапшылар жастардың бастамаларын жүйелі түрде қолдау мен оларды қолданбалы әлеуметтану мен саяси зерттеулерге кіріктірудің стратегиялық маңызын атап өтті.

Сонымен қатар жиында жас зерттеушілерді ғылыми қоғамдастыққа кіріктіру мен пәнаралық ынтымақтастықты кеңейтуге ықпал ететін көпплатформалы академиялық кеңістік құрудың өзектілігі талқыланды.

Отырыс барысында қатысушылар цифрлық көші-қон жағдайындағы жастардың тұлғалық ерекшеліктерінің өзгеруі мен саяси субъектіліктің артуынан бастап, халықаралық дипломатия, шекаралық ынтымақтастық пен ғылыми дипломатия мәселелеріне дейінгі ауқымды тақырыптарда баяндама жасады. Бұған қоса, орнықты даму мақсаттарын жүзеге асыру аясында жастардың халықаралық ұйымдармен өзара іс-қимыл перспективалары жан-жақты талқыланды.