Өткен ғасырдың ауыртпалықтары мен тарихи сындарынан сүрінбей өткен Қуандықов Қалдыбай Қуандықұлы мен Смайлова Жамалдың өмір жолы – ерлік пен еңбекке негізделген, ұрпаққа үлгі боларлық тағдырлар. Бұл қос ардагердің өнегелі өмірі – тек олардың отбасы үшін ғана емес, бүкіл ел үшін де ерекше маңызға ие.

Қалдыбай Қуандықұлы Қуандықов 1901 жылы дүниеге келген. Қараби руынан шыққан. 1941 жылы 22 маусымда фашистік Германия КСРО-ға тұтқиылдан шабуыл жасағанда, ол алғашқы күннен-ақ майданға аттанған. Ұлы Отан соғысының ең шешуші шайқастарының бірі – Сталинград майданында от пен оқтың ортасында жүріп ерлік көрсеткен. Қайсар мінезі мен батырлығының арқасында бірнеше ордендер мен медальдармен марапатталған. 1945 жылы 9 мамырда Берлин қаласында Жеңіс күнін қарсы алған.

Соғыстан кейін туған ауылына оралып, тынымсыз еңбекке кіріскен Қалдыбай Қуандықұлы ауыл шаруашылығының дамуына өз үлесін қосты. Ел экономикасын қалпына келтіру жолында аянбай еңбек етіп, халық игілігі үшін қызмет етті. Өмірінің соңына дейін туған жерінің өркендеуі үшін аянбай тер төккен азамат 1967 жылы 31 желтоқсанда дүниеден өтті.

Смайлова Жамал 1913 жылы дүниеге келген. Руы – Малтүгел. Ұлы Отан соғысы басталған кезде елде қалған әйелдер мен қарттардың иығына үлкен жауапкершілік артылды. Осы қиын-қыстау кезеңде Жамал Смайлова колхоз басқарған. Майдандағы жауынгерлерге қажетті азық-түлік, киім-кешек пен құрал-жабдықтарды дайындауға атсалысып, тылдағы ауыр еңбектің бел ортасында жүрді. «Бәрі майдан үшін, бәрі Жеңіс үшін!» деген ұранды өмірлік ұстанымға айналдырып, түн ұйқысын төрт бөліп адал еңбек етті.

Смайлова Жамал 60 жыл бойы Коммунистік партия мүшесі болып, ел алдында адал қызмет атқарды. Он бала тәрбиелеп өсіріп, үлкен бір әулеттің рухани тірегіне айналды. Ұрпақ тәрбиесіне, отбасылық құндылықтардың сақталуына үлкен мән беріп, кейінгі буынға өнегелі жол қалдырды. Әжем 1998 жылы 19 қаңтарда 85 жасында өмірден озды.

Қуандықов Қалдыбай мен Смайлова Жамалдың өмірі – бір ғасырлық тарихтың бейнесі, қайсарлық пен қажырлы еңбектің шежіресі. Олар ұлт үшін сын сағатта қолына қару алып, бейбіт күнде еңбек майданында алдыңғы қатарда жүрді. Олардың ерлікке, төзімге, адамгершілікке толы өмір жолы – ұрпағына мәңгілік рухани мұра, сарқылмас мақтаныш.