Облыс әкімі Берік Уәли жұмыс сапарымен Мақаншы ауданына келді. Аймақ басшысы сапарын Алакөл көлінің жағалауында жүргізіліп жатқан абаттандыру жұмыстарымен танысудан бастады.

Бұған дейін тұрғындар тарапынан жағалаудағы Арбаттың жағдайына байланысты сын көп айтылған еді. Қазіргі уақытта Арбат жаңартылып, бояу, сырлау жұмыстары жүргізілуде. Бұдан бөлек жағалаудағы ескірген темір жақтаулар толық ауыстырылуда.

Аудан әкімі Дәурен Қойгелдиннің айтуынша, биыл облыс әкімдігінен бөлінген қаражатқа туристік аймақта ауқымды жұмыс жүргізіледі. Жағалаудағы 5 шақырымға жуық жолға асфалть төселеді, 10 модульді, 15 биодәретхана, 40-тан астам киім ауыстыратын кабиналар қойылады, қоқыс жәшіктері мен бейнебақылау камераларының саны артады. Жағалауды нығайту үшін пирс және қалқыма орнатылады.

Ерекше атап өтерлігі, туристер көп келетін Арбаттың жүктемесін азайту үшін жаңа қоғамдық кеңістік салынады. Мұнда 100 адамға арналған сауда-саттық орындары қарастырылады, үлкен сахна, субұрқақ салынады, тұрғындар серуендейтін арнайы алаң болады.

Қазіргі уақытта жерді тегістеу, керамикалық тақтайшаларды төсеу және қоршау орнату жұмыстары басталған. Қоғамдық кеңістік құрылысы 1 шілдеге дейін аяқталады. Аймақ басшысы Арбат пен жағалауды аралап, жаңа қоғамдық кеңістіктің орнын көріп, аудан әкіміне абаттандыру жұмысын сапалы әрі уақтылы аяқтауды тапсырды.

Жазғы демалыс маусымында Алакөл жағалауында қауіпсіздікті қамтамасыз ету үшін 40 полиция қызметкері жұмылдырылады. Өрт қауіпсіздігін сақтау мақсатында Төтенше жағдайлар департаментінің қызметкерлері кезекшілікке тартылып, өрт сөндіру көліктері жұмыс істейді.