Облыс әкімі Берік Уәли ауданға жұмыс сапары барысында Барқытбел ауылында болды. Елдімекендегі 2021 жылдан бері құрылысы аяқталмай келе жатқан су құбыры желілерінің жағдайымен танысты.

Құрылыс жұмыстары 4 жыл бұрын басталған жобаның бүгінде 60 пайызға жуығы орындалған. 15,3 шақырым су желісі тартылған. Бұл ауылдағы 8 көшенің 5-ін қамтиды. Жалпы ұзындығы 20,7 шақырым болатын су желілері 296 абонентке есептелген. Жоба іске асқанда ауылдың мыңға жуық тұрғыны сапалы ауыз сумен қамтылатын болады. Қазіргі таңда ауыл тұрғындары құдықтан және елді мекен сыртындағы тұмадан су алып отыр.

Өткен жылы жобаны жалғастыру үшін облыстық бюджеттен 64 миллион теңге бөлінген. Жобаны толық аяқтау үшін 180 миллион теңге қаржы қажет. Түзетілген жобалық-сметалық құжаттаманы қайта бекіту үшін бюджеттік өтінім жолданған.

Аймақ басшысы ұзақ жылға созылған жобаны аяқтайтын кездің жеткенін айтты.