Сенаттың ресми сайтында «Талдау мектебі – Школа аналитики» курсының төртінші кезеңіне қатысушылар дайындаған талдамалық материалдар жинағы жарық көрді.

Жинақта білім берудегі инклюзия, азаматтардың экономикалық және саяси құқықтары мен мүмкіндіктерін қамтамасыз етудегі гендерлік тепе-теңдік, жасыл энергетиканы дамыту, еңбек көші-қоны, өңдеуші өнеркәсіпті дамыту, заң шығарудағы AI және Орталық Азиядағы орнықты даму мәселелерін қозғайтын жеті бағыт бойынша зерттеулер дайындаған 14 топтың жұмыстары бар.

Қазақстан Республикасы Парламенті Сенатының Төрағасы Мәулен Әшімбаев осыдан бұрын жинақтың тұсаукесері барысында еліміздің зияткерлік әлеуетін одан әрі нығайту бойынша Сенат жүргізіп жатқан жұмыстардың маңыздылығын атап өткен болатын.

«Осы жинақтан кейін «Талдау мектебінің» төртінші легіне қатысушылар өздерін тек түлектер ретінде емес, сонымен қатар, шешім қабылдайтын азаматтарға және ел дамуының өзекті мәселелеріне қызығушылық танытатын кең аудиторияға қолжетімді толыққанды аналитикалық басылымның авторлары деп атай алады. Сенат жанындағы Сарапшылар клубы мен «Талдау мектебі»– еліміздің зияткерлік әлеуетін қалыптастырып, нығайтуға қосқан біздің үлесіміз. Осындай бастамалар арқылы Президентіміз Қасым-Жомарт Кемелұлы Тоқаев жариялаған «Адал азамат» тұжырымдамасының негізгі құндылықтарын дәріптейміз. Олар – білім, азаматтық өсу, патриотизм және қоғам мүддесіне қызмет етуге дайын болу», - деп атап өтті Мәулен Әшімбаев.

Жинақ Парламент депутаттарына, салалық мемлекеттік органдарға, талдау орталықтарына, университеттерге жіберілетін болады.

Жинақпен мына сілтеме бойынша: https://senate.parlam.kz/ru-RU/taldau/materials/collections танысуға және жүктеуге болады.