Абай облысындағы әскери бөлімдердің бірінде ең бойшаң сарбаз Отан алдындағы борышын өтеп жатыр. 

«Шығыс» өңірлік қолбасшылығына қарасты Әуе шабуылына қарсы 31767-Л әскери бөлімінің сарбазы Арман Қайыржановтың бойы 2 метр,  8 сантиметр. Аяғына 50-ші өлшемдегі аяқ киім киеді.

Қатардағы жауынгер Арман Қайыржанов Павлодар облысы, Екібастұз қаласының тумасы. Сарбаздың отбасы да бойшаң екен. Оның ата-анасы, апайы мен қарындасы да көпшілік арасында бірден көзге түсетін көрінеді.

Арманға кез келген кереует сай келе бермейді. Сондықтан әскери төсекке 50 см қосып ұзартуға тура келген.  Ал әскери киім мен аяқ киімді арнайы тапсырыспен тіктіртіпті.

Арманның жасы қазір 19-да екенін ескерсек алдағы уақытта оның бойы тағыда өсуі мүмкін. Оның бойы мектепте де, колледжде де ең ұзын болыпты. Сондықтан баскетбол ойынына қызыққан көрінеді. 

Айта кетейік, Арман әскерге дейін қала әкімшілігі тарапынан «Екібастұз қаласының ең ұзын адамы» деген грамотамен марапатталған. Ол тіпті өз туған жерінің ғана емес, еліміз бойынша ең бойшаң жігіт екеніне сенімді. 

Абай өңірлік гарнизонының баспасөз қызметі