«Қазақ халқы тағдырының тайғақ кешулі кезеңдерінде жағасына келіп тыныс тапқан, суына бетін жуып, үмітін ертеңге жалғаған қасиетті Сыр дарияның бойында, ежелгі Ақмешіт, бүгінгі Қызылорда төрінде өздеріңізбен жүздесіп отырғаныма бек қуаныштымын! Мемлекет басшысы Қасым-Жомарт Кемелұлы Тоқаев «Алаш арыстары заманның сын-қатеріне қарамай, Қазақ елінің мемлекетшілдік идеясын жаңғыртты» деп алаш қозғалысына тарихи баға берген болатын. Жиырмасыншы ғасырдың басында Семейге топталып, ұлттың «болу мен бордай тозу» алдында тұрған шағында қайрат қылған қайран ерлер Ахмет Байтұрсынұлы мен Міржақып Дулатұлы, Жүсіпбек Аймауытұлы мен Мұхтар Әуезов, Әміре Қашаубаев сияқты тұлғалар ғасырдың екінші ширегі басталғанда Қызылордада қызмет етіп, мәдениет пен ағартуға өлшеусіз үлес қосты. Өткен ғасыр басындағы қазақтың мәңгі өлмес шығармалары Семейде басталып, Қызылордада нүктесі қойылып жатты. Бұл біз үшін бәрінен биік мақтаныш. Біз бүгін аймақтарыңызға үлкен делегациямен өнер жұлдыздарын, зиялы қауым өкілдерін және жақында ғана республикалық байқауда бас жүлде алған театрымыздың арнайы қойылымымен келіп отырмыз. Бұл өңір аралық рухани-мәдени байланыстарды нығайтып, біздерді бауырластыра түседі деп сенеміз», - деді облыс әкімі.