Абай облысы әкімдігінде Мемлекеттік қызметшілер күніне орай салтанатты жиын ұйымдастырылды. Шара аясында мемлекеттік қызметке жаңадан қабылданған бірқатар мамандар ел алдында адал қызмет етуге ант берді. Бұл рәсім – олардың мемлекет пен халық алдындағы жауапкершілігін айқындайтын ерекше сәт болып саналады.

Салтанатты жиынға облыс әкімінің аппараты мен аудандық бөлімдердің өкілдері қатысты. Қатысушылар жас мамандарды мемлекеттік қызметке қабылдануымен құттықтап, олардың кәсіби жолында табыс пен адалдық тілеп, еліміздің дамуына үлес қосуға шақырды. Мемлекеттік қызметші үшін басты қағида – халықтың сенімін ақтау, заң мен әділдікті берік ұстану екені атап өтілді.

Атап айтқанда, Жаңасемей ауданының ұйымдастыру бөлімінің бас маманы Мәдина Дулатқызы да ант беру рәсіміне қатысып, Қазақстан Республикасының Конституциясы мен заңдарын бұлжытпай орындауға, өз міндетіне адал болуға және азаматтардың құқықтары мен заңды мүдделерін қорғауға салтанатты түрде ант етті.

Шара соңында жас мемлекеттік қызметшілерге арнайы куәліктер табысталып, олардың жауапты қызмет жолындағы алғашқы қадамдарына сәттілік тілегі айтылды. Бұл рәсім – мемлекеттік қызметтің абыройы мен беделін арттырып, жас мамандарға үлкен серпін берген тағылымды оқиға болды.