Абай облысында облыс әкімі Берік Уәлидің қолдауымен, Абай облысының мәдениет, тілдерді дамыту және архив ісі басқармасының ұйымдастыруымен Мемлекеттік сыйлықтың лауреаты, «Парасат» және «III дәрежелі Барыс» ордендерінің иегері, көрнекті ақын Несіпбек Айтұлының 75 жылдық мерейтойына арналған еске алу шаралары басталды.

Жыр жампозын еске алуға арналған алғашқы басқосу Абай кітапханасындағы «Ұлт рухының жыршысы – Несіпбек Айтұлы» атты сұхбат алаңында өтті. Шараға ақынның аяулы жары Манат Жүкенқызы, ұлы Мұрат Несіпбекұлы және немересі Дулат қатысып, ақынның өмірі мен шығармашылығына қатысты естеліктерімен бөлісті.

Еске алу бағдарламасы мұнымен шектелмейді. Облыс орталығында ақын рухына құран-қатым бағышталып, бүгін сағат 15:00-де «Ес-Аймақ» рухани орталығында «Сәуле ғұмыр» атты әдеби-сазды танымдық кеш өтеді. Шара барысында Қазақстанның халық әртістері Секен Тұрысбеков пен Рамазан Стамғазиев бастаған өнер майталмандары ақын сөзіне жазылған ән-жырдан шашу шашады.