Абай облысының делегациясы «Ертіс: достық өзені – даму өзені» халықаралық форумына қатысты » 018.kz

Абай облысының делегациясы «Ертіс: достық өзені – даму өзені» халықаралық форумына қатысты

12-12-2025, 13:31 Думан Кенжеғазыұлы

Бүгін облыс әкімі Берік Уәли бастаған Абай облысының делегациясы Ресей Федерациясының Омбы қаласында өтіп жатқан «Ертіс: достық өзені – даму өзені» VII халықаралық туристік-көліктік форумына қатысты.

Іс-шараның негізгі мақсаты – «Ресей – Қазақстан – Қытай» мультимодальды транзиттік дәлізін қалыптастыру мүмкіндіктерін талқылау және бұл бағытта Ертіс өзенін тиімді пайдалану.

Форумға Ресей, Қазақстан және Қытай елдерінің жетекші сарапшылары, мемлекеттік органдардың өкілдері, кәсіпкерлік қауымдастық, кеме қатынасы және көлік логистикасы саласының мамандары, ғалымдар, Павлодар облысы мен Шығыс Қазақстан облысы әкімі мен орынбасарлары қатысты.

Биыл шілде айында Омбы облысы Үкіметі төрағасының орынбасары Андрей Шпиленко бастаған делегация Абай облысына арнайы келген болатын. Келіссөздер нәтижесінде Абай облысы әкімдігі мен Омбы облысы Үкіметі арасында Ертіс өзенін дамыту және бірлесіп пайдалану жөніндегі хаттамаға, сондай-ақ, 2025–2028 жылдарға арналған халықаралық және сыртқы экономикалық байланыстар жоспарына қол қойылды. Құжат отыз бағытты қамтиды. Оның ішінде туризм саласындағы бірлескен жобалар бар.

Омбыдағы форумның пленарлық отырысында сөз сөйлеген аймақ басшысы Абай облысының осы келісімдерді іске асыруға дайын екенін атап өтіп, өңірдің өндірістік, туристік әлеуетін жан жақты таныстырды. Қонақжайлық танытып, жылы қабылдағаны үшін Омбы облысының губернаторы Виталий Хоценкоға алғыс білдірді.

«Ресей – Қазақстанның негізгі сауда серіктестерінің бірі және еліміздің экономикасына үлес қосушы жетекші инвесторлардың алғашқы үштігіне кіреді. Қос мемлекетте де инвесторларды қолдау үшін барлық қажетті жағдай жасалып, бизнес жүргізуге қолайлы орта қалыптасқан. Қазақстан Президенті Қасым-Жомарт Кемелұлы Тоқаев атап өткендей: «Қазақстан мен Ресей арасындағы қарым-қатынастардың өткен тарихы бай, болашағы жарқын». Біздің өңір Ресейдің шекаралас облыстарымен тығыз байланыс орнатқан. Сауда-экономикалық қатынастар қарқынды дамып, мәдениет пен білім беру салаларындағы ынтымақтастық нығайып келеді. Өңірлеріміздің тарихи мұрасын ескере отырып, трансшекаралық туристік маршруттар құруды және оларды танымал халықаралық бағыттар деңгейінде танылатындай бірлескен бренд аясында ілгерілетуді ұсынамыз. Біз туристік компаниялар үшін Ертіс маңымен ғана шектелмей, облысымыздың бүкіл аумағын қамтитын ақпараттық турларды ұйымдастыруға дайынбыз. Сонымен қатар салаға қатысты мекемелер арасындағы мәдени ынтымақтастықты күшейту қажет. Бұл дегеніміз – бірлескен көрмелер, фестивальдер, тарихи реконструкциялар, театрлар мен музыканттардың, этнографиялық ұжымдардың гастрольдері. Бұдан бөлек кадрларды бірлесе даярлау мен тәжірибе алмасуды жандандыру маңызды. Атап айтқанда, гидтер мен экскурсия жүргізушілерін, мәдени туризм мамандарын даярлау, семинарлар, форумдар мен білім беру бағдарламаларын ұйымдастыру, туристік нысандар мен музей қорларын басқару бойынша ортақ ақпараттық платформалар құру және тәжірибе алмасу жұмыстары жүргізілуі тиіс. Біз ортақ тарихымызды және өзара достығымызды аса жоғары бағалаймыз. Осындай форумдардың арқасында жаңа мүмкіндіктер ашылып, халықтарымыз арасындағы өзара түсіністік пен сенім одан әрі нығая түседі. Мәдени-тарихи туризм – айтарлықтай нәтижелерге қол жеткізе алатын маңызды бағыттардың бірі. Біз әрқашан ашық диалогқа, ынтымақтастыққа және ортақ мақсаттарды жүзеге асыруға бағытталған бірлескен жұмысқа дайынбыз», - деді облыс әкімі.

Форум соңында облыс әкімі Берік Уәли мен Омбы облысының губернаторы Виталий Хоценко мәдениет саласындағы келісімге қол қойды.

Абай облысының сыртқы экономикалық байланыстары жыл сайын кеңеюде. Биылғы үшінші тоқсанның қорытындысы бойынша облыстың Ресей Федерациясымен тауар айналымы 823,4 млн АҚШ долларын құрады. Бұл –өткен жылдың сәйкес кезеңінен екі есе жоғары. Өңірде ресейлік капиталдың қатысуымен жұмыс істейтін 178 кәсіпорын бар. Олар экономиканың дамуына елеулі үлес қосып, жаңа тұрақты жұмыс орындарын ашып отыр.

Форум алдында облыс делегациясы Ертіс өзені тақырыбындағы фотокөрмені, Омбы облысының ұйымдарының иммерсивті шоуын, Омбы дизайнерлерінің көрсетілімін және Омбы облысының туристік көрмесін тамашалады.

Тағыда оқыңыз

Мемлекет басшысы Қасым-Жомарт Тоқаевтың Ұлттық құрылтайдың төртінші отырысында сөйлеген сөзі Қасым-Жомарт Тоқаев: «Мақсатым – экономиканы және егемендікті нығайту»Абай облысына Омбы облысының делегациясы келді Мемлекет басшысы Қасым-Жомарт Тоқаевтың Қазақстан халқына жолдауы «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу»Мемлекет басшысы Қасым-Жомарт Тоқаевтың Ұлттық құрылтайдың «Адал адам – Адал еңбек – Адал табыс» атты үшінші отырысында сөйлеген сөзі

Бізге ақпарат жолдаңыз Телеграмдағы каналымыз

Абай облысының делегациясы «Ертіс: достық өзені – даму өзені» халықаралық форумына қатысты

Пікірлер (0)