Ақмола облысының Щучинск қаласында Қорғаныс министрлігінің Спорт комитеті – Орталық спорт клубының базасында әскерилендірілген кростан чемпионат аяқталды.

Жарыс Қарулы Күштердің ХХ Спартакиадасы аясында өткен болатын. Оған Қарулы күштердің барлық түрлерінен, әскер тектері мен өңірлік қолбасшылықтардан 70 спортшыдан тұратын 17 команда қатысты.

– Ерлер үшін 3, әйелдер үшін 1,5 шақырымдық қашықтық белгіленді. Шағын калибрлі мылтықтан ату және Ф-1 гранатасын лақтыру үшін трассада арнайы учаскелер дайындалды. Әрбір мүлт кеткен нысана үшін жүз метрлік айыппұл шеңбері қосылды, – деп түсіндірді жарыс шарттарын Спорт комитеті спорттық іс-шараларды ұйымдастыру орталығының бастығы майор Атахан Нұридинов.

Командалық есепте "алтынды" Әуе қорғанысы күштерінің спортшылары, "күмісті" Десанттық-шабуылдау әскерлері, "қоланы" 32039 әскери бөлімінің спортшылары жеңіп алды. 

Ерлер арасында жеке есепте қатардағы жауынгер Руслан Бекешов чемпион атанды. Күміс жүлде 3-сыныпты сержант Жігер Нұршабаевта. Екі жауынгер де десанттық-шабуылдау әскерлерінің қызметшілері. "Қолаға" Әуе қорғанысы күштері құрамасының сапында өнер көрсеткен сержант Олжас Рашитов ие болды.

Әйелдер арасында Әуе қорғанысы күштерінің әскери қызметшісі сержант Рене Леоноваға тең келер ешкім болмады. Күміс жүлдені "Астана" өңірлік қолбасшылығының спортшысы кіші сержант Людмила Губарева, қола жүлдені әуе шабуылына қарсы қорғаныс әскерлерінің ефрейторы Данагүл Өмірзақова иеленді. 

Чемпионат қорытындысы бойынша әскерилендірілген кростан Қазақстан Қарулы күштерінің құрама командасы жасақталатын болады. Қазақстандық спортшылар ТМД әскери қызметшілері арасында өтетін халықаралық жарыстарда өнер көрсетеді. Жарыс ағымдағы жылдың қыркүйек айында Алматы қаласында өтеді.