Қазақстан Республикасы Сыртқы істер министрінің орынбасары Қанат Тумыш жаңадан тағайындалған Пәкістанның Қазақстандағы Елшісі Науман Башир Бхаттиден сенім грамоталарының көшірмелерін қабылдады.

Қ. Тумыш Елшіні қызметке тағайындалуымен құттықтап, оның алдағы қызметі екі ел арасындағы достық қарым-қатынастарды әрі қарай дамытуға ықпал ететініне сенім білдірді.

Сұхбат барысында дипломаттар өзара қызығушылық тудыратын барлық салалардағы Қазақстан мен Пәкістан арасындағы ынтымақтастығының, сондай-ақ көпжақты платформалар аясында оның жай-күйі мен келешегін талқылады.

Пәкістанның Елшісі екіжақты өзара іс-қимылды жандандыру үшін күш салу ниетін білдірді.

Кездесу соңында тараптар Қазақстан мен Пәкістан арасындағы әріптестікті одан әрі нығайту үшін тығыз байланыстарды жалғастыруға уағдаласты.