Абай облысында республикалық маңызы бар автожолдардың қысқы күтімі талапқа толық сай келмейтіні белгілі болды. Тексеру барысында 4200 метр жолда тапталған қар, 3100 метр мұз, 500 метр еріген қар және 155 метр жерде мұз қатпары тіркелген. Сондай-ақ борпылдақ қар мен қар үйінділері анықталып, көлік қозғалысына қауіп төндірген.

Бақылау 16–17 ақпанда Жол активтері сапасының ұлттық орталығы Абай облыстық филиалы мен КАЖсервис өкілдерінің қатысуымен өтті. Тексеру «Алматы – Талдықорған – Өскемен», «Шемонаиха – РФ шекарасы», «ҚХР шекарасы – Майқапшағай – Зайсан айналмасы – Қалбатау – Семей – Павлодар – РФ шекарасы» және «Өскемен – Семей» бағыттарында жүргізілді.

Анықталған кемшіліктерге байланысты ҚазАвтоЖол мен «КАЖсервис» ЖШС Абай облыстық филиалына ресми хат жолданып, олқылықтарды қысқа мерзімде жою міндеттелді.