Астанада ауыл шаруашылығы саласына арналған 21-ші халықаралық мамандандырылған AgriTek/FarmTek Astana 2026 көрмесі өз жұмысын бастады. Агроөнеркәсіп кешеніндегі ең ірі салалық маңызды шара «EXPO» халықаралық көрме орталығында өтуде және 12 наурызға дейін жалғасады.

Іс-шара Ауыл шаруашылығы министрлігінің, Астана қаласы әкімдігінің, Қазақстан құс өсірушілер одағының және Қазақстан егіншілер одағының қолдауымен ұйымдастырылды.

Көрме халықаралық мәртебеге ие және UFI – Дүниежүзілік көрме индустриясы қауымдастығының «UFI Approved Event» белгісімен марапатталған. Бұл белгі іс-шараның жоғары деңгейде ұйымдастырылғанын және саланың дамуы үшін өзекті екенін дәлелдейді.

Көрме алаңы 11 мың шаршы метрден астам аумақты қамтиды. Мұнда 11 елден келген 300-ден астам қатысушы агроөнеркәсіп кешеніне арналған түрлі өнімдерін, технологиялары мен қызметтерін таныстырады. Қатысушы елдер қатарында Қытай, Австрия, Беларусь, Германия, Испания, Польша, Ресей, АҚШ, Түркия, Италия және Қазақстан бар.

AgriTek/FarmTek Astana 2026 көрмесі ауыл шаруашылығы техникасы мен жабдықтары, қосалқы бөлшектер, суару технологиялары, тұқымдар мен көшеттер, тыңайтқыштар және өсімдіктерді қорғау құралдары, құс шаруашылығы мен мал шаруашылығына арналған шешімдер, ауыл шаруашылығы жануарларына арналған жем-шөп, ветеринариялық технологиялар сияқты басқа да тақырыптық бағыттарды қамтиды.

Жыл сайын көрмені 5 мыңнан астам фермер, аграрлық сала мамандары және кәсіпкерлер тамашалайды.

Іскерлік бағдарлама аясында ауыл шаруашылығын дамыту, инновациялық технологияларды енгізу және аграрлық саладағы халықаралық ынтымақтастықты кеңейту мәселелеріне арналған конференциялар, семинарлар және дөңгелек үстелдер өткізу жоспарланған.