Семей қаласындағы №7 емхана 34 мыңнан астам тұрғынға қызмет көрсетіп, диагностикалық мүмкіндіктерін кеңейтіп келеді.

Медициналық мекемеде 10-нан астам бөлімше жұмыс істейді. Қабылдау 30 бағыт бойынша жүргізіледі. Емхананың жоспарлы қуаттылығы бір ауысымда 430 адамды құраса, іс жүзінде күніне 800-ден астам науқас қабылданады.

Емханада күндізгі стационар, оңалту бөлімі, УДЗ, МРТ және КТ аппараттарымен жабдықталған сәулелік диагностика бөлімі, сондай-ақ функционалдық диагностика қызметі бар.

Сонымен қатар тұрғындарға жылжымалы медициналық кешендер арқылы көмек көрсету мүмкіндігі қарастырылған.

Емхана материалдық-техникалық базасын да күшейтіп келеді. 2025 жылы 150 млн теңгеге жаңа медициналық жабдықтар сатып алынған. Оның ішінде гастроскоптар, УДЗ аппараттары және холтерлер бар.

Қазіргі таңда емханада консультативтік-диагностикалық көмек көрсетуге қажетті құрал-жабдық толық жеткілікті.