Абай облысы ветеринария басқармасы биылғы жылдың I тоқсанында ветеринариялық қауіпсіздікті қамтамасыз ету бағытында бірқатар іс-шараларды жүзеге асырды. Облыс бойынша 3 262 бас қаңғыбас жануар ауланды. Бұл туралы өңірлік коммуникациялар қызметінде Абай облысының ветеринария басқармасының басшысы Ержан Барышев мәлімдеді.

Облыс аумағында ауыл шаруашылығы жануарларын бірдейлендіру және тұрақты эпизоотиялық жағдайды сақтау мақсатында бекітілген жоспарға сәйкес жұмыстар жүргізілуде. Бүгінде облыстық коммуналдық мемлекеттік кәсіпорынның 131 ветеринариялық пунктінде 646 ветеринариялық маман қызмет атқарады.

Аса қауіпті аурулар анықталған жағдайда қолданыстағы талаптарға сәйкес карантиндік және шектеу шаралары енгізіліп, індеттің таралуына жол бермеу мақсатында ветеринариялық-сауықтыру жұмыстары жүргізіледі.Абай облысының ветеринария басқармасы және оған қарасты ұйымдар 4 мемлекеттік қызмет көрсетеді. Есепті кезеңде ветеринария саласында қызмет жүргізуге лицензиялар берілмеген.

Сонымен қатар, 2026 жылғы 31 наурызда өткен облыстық мәслихат сессиясында қаңғыбас жануарларды аулау шараларына қаржы бөлу туралы шешім қабылданды. Осыған сәйкес 10 864 қаңғыбас жануарды аулау, 435 жануарды уақытша ұстау, сәйкестендіру, вакцинациялау және стерилизациялау жұмыстарына қаражат бөлінді.