Абай облысында жастардың жан-жақты дамуына жағдай жасау – мемлекеттік саясаттың басым бағыттарының бірі. Бүгінде өңірде 150 мыңға жуық жас тұрады. Бұл – облыс халқының төрттен бір бөлігі.

Осы бағыттағы жұмыстар аясында облыс әкімі Берік Уәли қолдауымен Курчатов қаласында жаңартылған Жастар ресурстық орталығының салтанатты ашылуы өтті.

1949 жылы салынған ғимарат былтыр толықтай күрделі жөндеуден өтіп, биыл пайдалануға берілді. Жалпы аумағы 1123,4 шаршы метрді құрайтын нысан ұзақ уақыт бойы қолданылмай келген. Қазір ол білім беру, креативті индустрия, әлеуметтік және цифрлық бағыттарды біріктіретін заманауи көпфункционалды орталыққа айналды.

Салтанатты шара барысында аймақ басшысы жастар саясаты мемлекет үшін маңызды бағыт екенін атап өтті.

Курчатов қалалық жастар орталығының директоры Айжан Мұсатаева орталықтың негізгі бағыттарымен таныстырды.

Орталықтағы ерекше аймақтардың бірі – заманауи медиа-студия. Мұнда жастар фото және видеоөндіріс, SMM, журналистика, подкаст жүргізу және контент жасауды меңгере алады. Облыс әкімі медиа-студияда болып, жастармен бірге подкастқа қатысып, олардың сұрақтарына жауап берді.

Сонымен қатар орталықта тіл үйрету кабинеттері, шығармашылық арт-лаундж, еркін пікір алмасуға арналған lounge-аймақ, VR/AR/AI цифрлық зертханасы жұмыс істейді. Мұнда жастар виртуалды және толықтырылған шынайылық, жасанды интеллект бағыттарымен танысып, тәжірибе жинақтай алады.

Жастардың психологиялық қолдауына да ерекше көңіл бөлінген. Орталықта психологиялық сергіту ойын бөлмесі мен білім, жұмысқа орналасу және мемлекеттік бағдарламалар бойынша кеңес беретін алаңдар қарастырылған.

Шығыс Қазақстан облысы Ұлан ауданынан келген Қаламқас Анербекова жаңа орталықтың жастар үшін үлкен мүмкіндік екенін айтты.

Сондай-ақ іс-шара аясында «Мемлекеттік жастар саясаты мектебі» республикалық семинар-тренингі ұйымдастырылды. Оған еліміздің 12 өңірінен келген 30-дан астам маман қатысты.

Қостанай облысының өкілі Аян Қабдолла семинардың мазмұнды өткенін атап өтті.

Айта кетейік, Абай облысында NEET санатындағы жастар үлесі айтарлықтай төмендеген. 2023 жылы көрсеткіш 4,4 пайыз болса, биыл 1,86 пайызға дейін азайды. Бұл бағытта жастарды маусымдық жұмыспен қамтитын «Жасыл ел» бағдарламасы мен жас мамандарды тұрғын үймен қамтамасыз ететін «Абай жастары» бағдарламасының үлесі зор. Биылдың өзінде Семей қаласында 30 жас маман баспаналы болды.