Бүгін Семей қаласында Қазақстан Республикасы Қаржылық мониторинг агенттігі жас қызметкерлерінің өңірлік слеті басталды. Маңызды басқосуға Алматы қаласы, Абай, Жетісу, Алматы, Шығыс Қазақстан және Павлодар облыстарының жас мамандары жиналды.

Слеттің ашылу салтанатына облыс әкімі Берік Уәли, Қаржылық мониторинг агенттігі төрағасының орынбасары Жеңіс  Елемесов қатысып, жас қызметкерлерді құттықтады.

Аймақ басшысы Президент айқындаған Заң мен Тәртіп қағидатын нығайту жолында Қаржылық мониторинг агенттігінің атқарып отырған жұмысының маңызын атап өтті.

Ерекше атап өтерлігі, облыс әкімдігі мен Абай облысы бойынша Экономикалық тергеп-тексеру департаменті арасындағы өзара іс-қимылдың нәтижесінде заңсыз қаражат тартқан құрылыс салушыларға қатысты тергеу барысында үлескерлердің құқықтары қорғалып, келтірілген залал өтеліп, азаматтар баспанасына қол жеткізді.

Слет аясында қатысушылар тәжірибе алмасып, қаржылық қауіпсіздік, экономикалық құқық бұзушылықтардың алдын алу, кәсіби даму, психологиялық даярлық және қызмет барысында тиімді коммуникация қалыптастыру мәселелері бойынша практикалық сессиялар мен тренингтерге қатысады. Сондай-ақ, құқық қорғау органдарының басшыларымен және сала ардагерлерімен кездесу ұйымдастырылады.